رووداو دیجیتاڵ
بەگوتەی سێ پەرلەمانتاری عێراق، بڕیارە ئەمشەو سەرۆکوەزیرانی عێراق خۆی لەگەڵ وەزیری دارایی و پارێزگاری بانکی ناوەندیی عێراق بچێتە پەرلەمان و لەگەڵ دەستەی سەرۆکایەتی پەرلەمان و لیژنەی دارایی پەرلەمانی عێراق کۆببنەوە.
هەریەک لە شێروان دووبەردانی و زیرەک زێباری، ئەندامانی پەرلەمانی عێراق لە فراکسیۆنی پارتی دیموکراتیی کوردستان و چنار حاجی، پەرلەمانتاری فراکسیۆنی یەکێتیی نیشتمانیی کوردستان، ئەمڕۆ پێنجشەممە بە تۆڕی میدیایی رووداویان راگەیاند، بڕیارە کاژێر 8ی ئەمشەو، عەلی فالح زەیدی، سەرۆکوەزیرانی عێراق خۆی لەگەڵ فالح ساری، وەزیری دارایی و نزار ناسر، پارێزگاری بانکی ناوەندیی عێراق بێتە پەرلەمان و لەگەڵ دەستەی سەرۆکایەتی پەرلەمان و لیژنەی دارایی پەرلەمان لەبارەی بڕیاری دەستکاریکردنی بەهای دۆلار بەرامبەر دینار کۆبێتەوە و روونکردنەوەی پێویست بدات.
بەگوتەی زێباری، هەر پەرلەمانتارێک بیەوێت دەتوانێت بەشداری کۆبوونەوەکە بکات. شێروان دووبەردانی، گوتی، ئەوەی هەیە تاوەکو ئێستا بڕیارە سەرۆکوەزیرانی عێراق خۆی بێت، جا نازانرێت لە دوایین ساتەکان چ بڕیارێکی دیکە دەدرێت.
رۆژی چوارشەممە بڕیار درابوو دانیشتنی ئەمڕۆی پەرلەمانی عێراق بە ئامادەبوونی وەزیری دارایی و پارێزگاری بانکی ناوەندیی عێراق بەڕێوەبچێت، بەڵام نەکرا.
ئەنجوومەنی وەزیرانی عێراق، رۆژی 6ی تشرینی یەکەمی 2026، لە کۆبوونەوەی ئاسایی خۆیدا بڕیاری دا نرخی ئاڵوگۆڕی دینار بەرامبەر دۆلاری ئەمریکی بگۆڕێت و نرخی فرۆشتنی هەر دۆلارێک بۆ هاووڵاتییان بە 1520 دینار دیاریبکات و لە دوێنێ چوارشەممەوە کاری پێدەکرێت.
نرخە نوێیەکان بەمشێوەیەن:
نرخی کڕینی دۆلار لە وەزارەتی دارایی: 1500 دینار بۆ هەر دۆلارێک.
نرخی فرۆشتنی دۆلار بە بانکەکان: 1510 دینار بۆ هەر دۆلارێک.
نرخی فرۆشتنی دۆلار بە هاووڵاتییان: 1520 دینار بۆ هەر دۆلارێک.
پێشتر نرخەکان بەمشێوەیە بوون:
نرخی کڕینی دۆلار لە وەزارەتی دارایی: 1300 دینار بۆ هەر دۆلارێک.
نرخی فرۆشتنی دۆلار بە بانکەکان: 1310 دینار بۆ هەر دۆلارێک.
نرخی فرۆشتنی دۆلار بە هاووڵاتییان: 1320 دینار بۆ هەر دۆلارێک.
