رووداو دیجیتاڵ
عەلی فالح زەیدی، سەرۆکوەزیرانی عێراق، بانگهێشتێکی فەرمی ئاراستەی ئەو کۆمپانیا جیهانییانە کرد کە پسپۆڕن لە بەڕێوەبردن و کارپێکردنی فڕۆکەخانەکاندا، بۆ ئەوەی وەبەرهێنان لە فڕۆکەخانەی نێودەوڵەتیی موسڵ بکەن و خزمەتگوزارییەکانی پەرەپێبدەن، بەشێوەیەک کە شایستەی پارێزگای نەینەوا و مێژووەکەی بێت.
ئەم بانگهێشتە رۆژی دووشەممە، 12ی تشرینی یەکەمی 2026، لە کاتی سەردانێکی زەیدی هات بۆ شاری موسڵ، کە تێیدا دەستپێکردنی کارەکانی لە پڕۆژەی ملیۆنێک پارچە زەوی نیشتەجێبوون راگەیاند و بەدواداچوونی بۆ پڕۆژە خزمەتگوزاری و گەشەپێدانەکان کرد، یەکێک لەوانەش فڕۆکەخانەی نێودەوڵەتیی موسڵ بوو.
سەرۆکوەزیرانی عێراق رایگەیاند، شاری موسڵ رووکارێکی شارستانیی عێراق و دەروازەیەکی گرنگە بۆ جیهان. ئاماژەی بەوەشکرد، حکومەت بە جددی کاردەکات بۆ تەواوکردنی پڕۆژە گرنگەکانی پارێزگاکە، بەجۆرێک کە وەڵامدەرەوەی داواکاری و پێداویستییە خزمەتگوزاری و ئابوورییەکانی خەڵکەکەی بێت.
زەیدی، روونیکردەوە کە فڕۆکەخانەی موسڵ تەنیا پڕۆژەیەکی خزمەتگوزاری نییە، بەڵکو دەروازەیەکی گرنگە بۆ پارێزگاکە و عێراق بەگشتی، بەتایبەتی دوای بڕیاری گەڕاندنەوەی نەینەوا بۆ سەر نەخشەی فڕۆکەوانی و وەبەرهێنان. گوتیشی: "ئەو کۆمپانیایانەی دێن، نامانەوێت تەنیا هۆڵێکی خزمەتگوزاری دروستبکەن، بەڵکو دەبێت ببنە هاوبەشێکی گرنگ کە فڕۆکەخانەی موسڵ دەکاتە شوێنێکی گرنگی خزمەتگوزاری."
