رووداو دیجیتاڵ
لە چوارچێوەی هەوڵەکان بۆ تەواوکردنی کابینەی حکومەت، ئەمڕۆ سێشەممە (13ـی تشرینی یەکەم 2026)، عەلی فالح زەیدی، سەرۆکوەزیرانی عێراق، نووسراوێکی ئاراستەی سەرۆکایەتیی پەرلەمانی عێراق کرد.
لەو نووسراوەدا کە وێنەیەکی دەست تۆڕی میدیایی رووداو کەوتوە، داواکراوە رۆژی پێنجشەممە (15 تشرینی یەکەم 2026) وەک کاتی دانیشتنی پەرلەمان دیاری بکرێ.
ئامانجی سەرەکی لەم دانیشتنەدا خستنەدەنگی بەربژێرانی پۆستی وەزارەتە بەتاڵەکان و وەزارەتە تازە دروستکراوەکان. عەلی زەیدی لە نووسراوەکەیدا پشتی بە مادەی (76/چوارەم)ـی دەستووری عێراق بەستووە، کە رێکارە دەستوورییەکان بۆ تەواوکردنی کابینەی حکومی دیاری دەکات.
سەرۆکوەزیرانی عێراق رێوشوێنێکی نوێی خستووەتەڕوو کە تێیدا هاتووە:"جێگرانی سەرۆکوەزیران بەبێ مووچە و تەرخانکراوی دارایی و بەبێ دامەزراندنی نوێ بۆ پۆستەکانیان کار دەکەن". ئەم هەنگاوە وەک بەشێک لە سیاسەتی کەمکردنەوەی خەرجییەکان و پابەندبوون بە بنەماکانی بەڕێوەبردنی دەوڵەت و هاوئاهەنگی نێوان دەسەڵاتەکان لێک دەدرێتەوە".
چاوەڕوان دەکرێ سەرۆکوەزیرانی عێراق چوار جێگری هەبێت، دوو شیعە، سوننەیەک و کوردێک.
هەریەک لە شێروان دووبەردانی و جووتیار خدر، ئەندامانی پەرلەمانی عێراق ئەمڕۆ بە تۆڕی میدیایی رووداویان راگەیاند، بڕیارە رۆژە پێنجشەممە پەرلەمانی عێراق کۆبێتەوە، بەڵام تاوەکو ئێستا بە بڕیاری فەرمی ئاگادارنەکراونەتەوە.
