رووداو دیجیتاڵ
بانکی خانوبەرەی عێراق بە هاوئاهەنگی لەگەڵ وەزارەتی دارایی و بانکی ناوەندیی عێراق، زیادکردنی تەرخانکراوی دەستپێشخەریی نیشتەجێبوونی بۆ ساڵی 2026 بە گوژمەی یەک تریلیۆن دینار راگەیاند، ئەوەش بە مەبەستی پێدانی قەرز بەو هاووڵاتییانەی دەیانەوێت لە کۆمەڵگە وەبەرهێنانکارییەکاندا یەکەی نیشتەجێبوون بکڕن.
ئەمڕۆ شەممە، 24ـی تشرینی یەکەمی 2026، وەزارەتی دارایی عێراق لە راگەیێندراوێکدا ئاماژەی بەوە کرد، لەسەر راسپاردەی عەلی زەیدی، سەرۆکوەزیرانی عێراق، فالح ساری، وەزیری دارایی و نزار ناسر، پارێزگاری بانکی ناوەندی، بڕیار دراوە بە زیادکردنی بڕی تریلیۆنێک دینار بۆ دەستپێشخەریی خانوبەرە بە مەبەستی پاڵپشتیکردنی خێزانەکان لە پارێزگاکانی عێراق.
بەپێی راگەیێندراوەکە، ئامانجی سەرەکی لەم هەنگاوە دابینکردنی پێداویستیی نیشتەجێبوون و وەڵامدانەوەی داواکاریی ئەو هاووڵاتییانەیە کە دەیانەوێت لە رێگەی قەرزی خانووبەرەوە یەکە لەنێو کۆمەڵگە نیشتەجێبوونەکاندا بکڕن.
وەزارەتی دارایی ئاماژەی بەوە کردووە کە دەستپێشخەرییەکە چەند ئامانجێکی گەشەپێدان و ئابووری دەپێکێت، لەوانە: "بەشداریکردن لە چارەسەرکردنی قەیرانی نیشتەجێبوون لە رێگەی دروستکردنی یەکەی نوێی مۆدێرن لە پارێزگاکاندا، رەخساندنی هەلی کار بۆ گەنجان و بەگەڕخستنەوەی دەستی کار لە بازاڕدا، لەگەڵ بوژاندنەوەی ئابووریی نیشتمانی و پاڵپشتیکردنی بەرهەمی ناوخۆیی، بەتایبەتی کارگەکانی خشت، ئاسن، چیمەنتۆ و کەرەستە بیناسازییە پلاستیکییەکان."
لە راگەیێندراوەکەدا هاتووە، ئەنجوومەنی کارگێڕیی بانکی خانوبەرە لە کۆبوونەوەی رۆژی سێشەممە (20ـی تشرینی یەکەمی 2026)، رێنماییە تایبەتەکانی بەم دەستپێشخەرییە پەسند کردووە و دەستی بە رێکارەکانی پێدانی قەرز کردووە بەپێی ئەو مەرج و رێنماییانەی کە دیاریکراون.
سەبارەت بە میکانیزمی پێشکێشکردن و کەمکردنەوەی رۆتین لەبەردەم هاووڵاتییاندا، بانکی خانوبەرە روونیکردووەتەوە کە بە هاوئاهەنگی لەگەڵ بانکی ناوەندیی عێراق، سیستمی پێدانی قەرز و دانەوەی مانگانەی قیستەکانی لە رێگەی پلاتفۆرمی ئەلیکترۆنی و ئەپڵیکەیشنی مۆبایلەوە کارا کردووە.
ئەم رێکارە نوێیە وا دەکات هاووڵاتییان لە 15 پارێزگای عێراق بتوانن بەبێ سەردانیکردنی راستەوخۆی لقەکانی بانکەکە، لە رێگەی مۆبایلەکانیانەوە تەواوی پرۆسەی گەڕاندنەوەی پارە و دانەوەی قیستەکان جێبەجێ بکەن.
