رووداو دیجیتاڵ
ئەمڕۆ چوارشەممە (21ـی تشرینی یەکەمی 2026)، سەرۆک مەسعود بارزانی لە پیرمام پێشوازی لە ستیڤ فەیگن، هەڵسوڕێنەری کاروباری باڵیۆزخانەی ئەمریکا لە عێراق و شاندێکی یاوەری کرد.
بەگوێرەی راگەیەندراوێکی بارەگای بارزانی، لە دیدارەکەدا کە بە ئامادەبوونی وێندی گرین، کۆنسووڵی گشتیی ئەمریکا لە هەولێر بەڕێوەچوو، ستیڤ فەیگن سوپاسی رۆڵی سەرۆک بارزانی کرد لە پشتیوانیکردنی پرۆسەی سیاسیی عێراق. لای خۆیەوە سەرۆک بارزانی رایگەیاند، لە چوارچێوەی دەستوور و پاراستنی مافە رەواکانی گەلی کوردستان پشتیوانی لە سەرۆک وەزیرانی ئێستای عێراق دەکەن، ئاماژەی بەوەش دا کە پەیوەندییەکانیان لەگەڵ بەغدا لەسەر بنەمای دەستوور و پرەنسیپەکانی هاوبەشی، هاوسەنگی و سازان رێکخستووەتەوە. پێشی وابوو ئەگەر حکومەتەکانی پێشووی عێراق پابەندی ئەو بنەمایانە بوونایە، دەستکەوتی زیاتر بۆ هەموو لایەک دەهاتەدی.
سەبارەت بە رەوشی پێکهاتەکان، سەرۆک بارزانی پشتیوانیی خۆی بۆ پێکهاتەکانی کوردستان، بەتایبەتی کریستیانەکان لەسەر بنەمای رێز و شەراکەت و مافی دەستووری دەربڕی و جەختی لەوە کردەوە کە دەبێت پێکهاتەکان خۆیان بڕیار لە چارەنووسی خۆیان بدەن. هەروەها تیشکی خستە سەر گرنگیی هەموارکردنەوەی یاسای هەڵبژاردنەکان بۆ ئەوەی ئیرادەی کریستیانەکان لای خۆیان بێت و رێگری بکرێت لەوەی کەسانی دیکە لە جێگەی ئەوان بڕیار بدەن.
لە بەشێکی دیکەی دیدارەکەدا، دۆخی ناوچەکە تاوتوێ کرا. سەرۆک بارزانی دووپاتی کردەوە کە هەرێمی کوردستان هەر لە سەرەتاوە سیاسەتی روون بووە، بەشێک نییە لە ئاڵۆزییەکان و نابێتە بەشێک لە ململانێکان، داواشی کرد کێشەکان لەرێگەی دیپلۆماسی و گفتوگۆوە چارەسەر بکرێن.
لە بەرامبەردا، شاندی ئەمریکا جەختیان لە بەردەوامیی پابەندبوونی وڵاتەکەیان بە ئاسایش و سەقامگیریی عێراق و هەرێمی کوردستان کردەوە. روونیشیان کردەوە کە کۆتاییهاتنی ئەرکی هاوپەیمانان بە واتای کۆتاییهاتنی پابەندبوونی ئەمریکا نایەت، بەڵکو واشنتن لە چوارچێوەی پەیوەندییە دووقۆڵییەکاندا لە رووی ئاسایش، ئابووری، سیاسی و سەربازییەوە پابەندە بە پاراستنی سەقامگیری و هاوپەیمانێتییەکەی لەگەڵ هەولێر و بەغدا.
