رووداو دیجیتاڵ
هێزەکانی پشتیوانی یەک لەژێر ناونیشانی "شێر" مانۆڕێکی سەربازیی فراوانیان لە بناری چیای پیرس لە سنووری ئاکرێ ئەنجامدا.
لە مانۆڕەکەدا کە لەژێر چاودێریی وەزارەتی پێشمەرگە و هێزەکانی هاوپەیمانان بەڕێوەچوو، تانک، تۆپهاوێژ، زریپۆش، مووشەکهاوێژ و هاوەن تاقیکرانەوە.
پەیامنێری رووداو لە شوێنی مانۆڕەکەوە رایگەیاند، ئەمە یەکەم جارە مانۆڕێکی سەربازی بەو شێوە فراوان و پێشکەوتووە ئەنجام بدرێت، کە تێیدا زیاتر لە 600 ئەفسەر و پێشمەرگە بەشدار بوون.
فەریق سیهاد بارزانی، فەرماندەی فەرماندەیی هێزەکانی پشتیوانی یەک گوتی، "دەتوانم بڵێم لە ئاستی وەزارەتی پێشمەرگە یەکەم جارە مانۆڕتکی ئەوها کرابێت. پشتیوانییەکی یەکجار گەورە لەلایەن حکومەت و مەسرور بارزانی، سەرۆکوەزیرانی هەرێمی کوردستانەوە بۆ ئێمە هەیە".
هاوکات، عەبدولخاڵق بابیری، بریکاری وەزارەتی پێشمەرگە رایگەیاند، "پێشەمەرگە بەردەوام پێویستی بەمجۆرە مانۆڕانە هەیە، هەموو ئەو پەروەردە و ئامادەکردنەی بۆ پێشمەرگە دەکرێت، بۆ تەشکیلاتی نوێی و بۆ پرسی یەکگرتنەوەیە".
لە کۆتایی مانۆڕەکەدا، پێشمەرگەکانی هێزەکانی پشتیوانی یەک گەیشتنە دوایین خاڵی دیاریکراوی ئامانجەکە و ئاڵای کوردستانیان لەوێ چەقاند.
