رەنجە جەمال

بەر لە دەستپێكردنی پەخشی تۆڕی میدیایی رووداو، وەك پەیامنێر وەرگیراوەو بەشداری خولی پەرەوردە و پێگەیاندنی پەیامنێرانی رووداوی كردووە لەلایەن راهێنەرانی ئەوروپاییەوە.

زیاتر لە 1000ڤیتی، هەواڵ، سەدان رووماڵی رووداوە سیاسی، ئابووری، سەربازی، رۆشنبیری و كۆمەڵایەتییەكانی ئەنجامداوە.
رەنجە جەمال، بەر لە هێرشی داعش بۆ سەر موسڵ ، یەكەم ڤیتی لە راگەیاندنی كوردیدا لەسەر جموجۆڵی چەكدارانی داعش لە دەشتی قەراج و سنوورەكانی نێوان پارێزگای نەینەوا، كەركووك و سەڵاحەدین ئامادەكرد . 

لە 30ی ئایاری 2016 ڤیتییەكی مەیدانی لەسەر دەستگیركردنی دوو چەكداری داعش لە سنووری گوندە كاكەییەكانی رۆژئاوای قەزای خەبات و چۆنیەتی دەرهێنان و خۆبەدەستەوەدانی دوو چەكدارەكە لەنێو تونێلێك لە ڤیتیەكەدا پیشاندا و، ئەو ڤیتییە لەلایەن زۆر كەناڵی جیهانی و كەناڵە ئەندامەكانی ئینێكس بڵاوكرایەوە.

لە مووسڵ بۆ ئامادەكردنی چەند ئەڵقەیەكی بەرنامەی ( فۆكەس موسڵ)، هاوكاری شەهید شیفا گەردی كردووە بۆ بەرهەمهێنانی ڤیتی مەیدانی بۆ بەرنامەكەی لەبەرەی شەڕی موسڵ.
لەلایەن تۆڕی میدیایی رووداوەوە نێردراوەتەوە وڵاتانی توركیا،میسر، لوبنان ، ئوردن بۆ رووماڵ و ئامادەكردنی ڤیتی و فیچەر.

رەنجە جەمال، لە 9ی كانوونی دووەمی 1987 لە قەزای كۆیە لەدایكبووە. دەرچووی بەشی زمانی عەرەبی كۆلیژی زمانی زانكۆی سەڵاحەدینە لە ساڵی 2009-2010 .
لە ساڵی 2011 دەستی بە كاری راگەیاندن كردووە و لە كەناڵی ئاسمانی هەولێر و چەند گۆڤار و رۆژنامەیەك كاری كردووە.

رەنجە وەرزشوانە و لە ساڵی 1998 تاوەكو 2008 یاریزانی ئاستی لاوانی هەریەك لە یانەكانی ئاسۆ، هەولێر، ئاڵا، بروسك و هەڵبژاردەی بنكەی وەرزش و لاوانی هەولێر بووە. خێزاندارە و باوكی كوڕێكە.