رووداو دیجیتاڵ
بەڕێوەبەری گشتیی کشتوکاڵی دهۆک دەڵێت، خەیاری ئەم ساڵ لە سنوورەکە گەیشتووەتە ئاستێکی زۆر باش و بەشێکی زۆری هەناردەی بازاڕەکانی نێوەڕاست و باشووری عێراق دەکرێت. هەروەها ئاشکرای کرد، تاوەکو 1ـی تەممووز، 128,000 تۆن بەرهەمی جۆراوجۆری کشتوکاڵی لە دهۆکەوە هەناردەی شارەکانی عێراق کراون.
لە پارێزگای دهۆک 7,000 دۆنم زەوی بە خەیار چێندراوە و پێشبینی دەکرێت بەرهەمەکەی لە 45,000 تۆن زیاتر بکات. ئەحمەد جەمیل، بەڕێوەبەری گشتیی کشتوکاڵی دهۆک، بە تۆڕی میدیایی رووداوی راگەیاند: "ئەمڕۆ کیلۆی خەیار لە دهۆک بە 250 تاوەکو 450 دینار فرۆشرا." ئاماژەی بەوە کرد، ئەگەر نرخەکە لە 400 دینار بێت، جووتیاران زەرەر ناکەن، چونکە بازاڕی سەرەکیی بەرهەمەکانمان شارەکانی عێراقە و بۆ ئەمە پشتگیریی جووتیار و بازرگانان دەکەن.
بەگوێرەی ئامارەکان، تەنیا لەم وەرزەدا 7,000 تۆن خەیار بۆ پارێزگاکانی عێراق نێردراون. بۆ پاراستنی بەرهەمی ناوخۆ، لە مانگی نیسانەوە تاوەکو مانگی تشرینی دووەم، باجێکی زۆر خراوەتە سەر هاوردەکردنی خەیار کە 600 دینارە بۆ هەر کیلۆیەک، ئەمەش وای کردووە خەیاری بیانی لە بازاڕەکاندا نەمێنێت.
بەڕێوەبەری گشتیی کشتوکاڵی دهۆک ئاماژەی بەوەش کرد، ئێستا هاوئاهەنگی لەگەڵ بەغدا زۆر باشە و بەرهەمەکان بە ئاسانی دەگوازرێنەوە. گوتیشی: "ئەم ساڵ زیاتر لە 14,000 پشتگیری بۆ جووتیار و بازرگانان کراوە بۆ هەناردەکردنی بەرهەمەکانیان."
ئەم ساڵ لە سنووری پارێزگای دهۆک، 120,000 دۆنم زەوی بە بەرهەمە هاوینییەکان چێندراوە و چاوەڕوان دەکرێت کۆی بەرهەم بگاتە زیاتر لە 600,000 تۆن.
