رووداو دیجیتاڵ
نرخی بەنزینی نۆرماڵ لە سلێمانی 50 دینار دابەزی. گوتەبێژی بەنزینخانەکانی شارەکە دەڵێ، هۆکارەکەی دابەشکردنی بەنزینی 750 دینارییە.
رۆژی شەممە 3ـی تشرینی یەکەمی 2026 بەهمەن قادر، گوتەبێژی بەنزینخانەکانی سلێمانی بە رووداوی گوت: "ئەمڕۆ نرخی بەنزینی نۆرماڵ لە 1200 دینارەوە دابەزی بۆ 1150 دینار، بەڵام نرخی سوپەر و موحەسەن وەک خۆیەتی".
گوتەبێژی بەنزینخانەکانی سلێمانی هۆکاری ئەم دابەزینەی بۆ دابەشکردنی بەنزینی 750 دینار گەڕاندەوە و گوتی، رۆژانە بڕی پێویست لەو بەنزینە دابەش دەکرێ و ئەمەش وای کردووە خواست لەسەر بەنزینی بازرگانی کەم بێتەوە.
نرخی ئێستای بەنزین لە سلێمانی
بەنزینی نۆرماڵ 1150 دینار
بەنزینی موحەسەن 1750 دینار
بەنزینی سوپەر1990 دینار
هاوکات ژیار عومەر، شۆفێری تەکسی لە سلێمانی بە رووداوی گوت: "بەراورد بە هەفتەی رابردوو، نرخی بەنزینی بەشێک لە بەنزینخانەکان دابەزیوە بۆ 1150 دینار، لە کاتێکدا هەفتەی رابردوو نرخەکەی 1200 دینار بوو".
ئەو شۆفێریی تەکسییە باسی لەوەشکرد، هێشتا نرخی بەنزین بەراورد بە پار بەرزە، هەربۆیە ناچارن سەرە بگرن بۆ بەنزینی 750 دیناری.
هاوکات سەرباز کەریم، گوتەبێژی بازاڕی سووتەمەنی لە هەولێر بە رووداوی گوت: "هیچ گۆڕانکارییەک لە نرخی جۆرەکانی بەنزین لە هەولێر رووی نەداوە و نرخەکان جێگیرن".
سەبارەت بە نرخی ئێستای بەنزینی نۆرماڵ لە شارەکە سەرباز کەریم گوتی، زیاتر لە 10 رۆژە نرخی بەنزینی نۆرماڵ 1330 دینارە.
