رووداو دیجیتاڵ
سەرۆکی هەرێمی کوردستان ئەمڕۆ 10ی تشرینی یەکەمی 2026 پرسەنامەیەکی بۆ کۆچی دوایی نووسەر و وەرگێڕی ناوداری كوردستان مامۆستا جەلیل کاکەوەیس بڵاوکردەوە، سەرەخۆشی لە بنەماڵە و کەسوکاری کۆچکردوو و تەواوی نووسەران و رووناکبیرانی کوردستان کرد.
نێچیرڤان بارزانی لە پرسەنامەکەدا ئاماژەی بەوەکردووە مامۆستا جەلیل کاکەوەیس خاوەنی پێگەیەکی دیار و خزمەتێکی گەورە بوو لە بزووتنەوەی وێژه‌يى و فەرهەنگیی کوردستان، "بە بەرهەم و وەرگێڕانە دەوڵەمەندەکانی، بەتایبەتی لە بواری چیرۆک و وێژه‌ى هاوچەرخدا، خزمه‌تێكى زۆرى پێشکەش کردووە."
دەقی پەیامەکەی سەرۆکی هەرێمی کوردستان:
بۆ کۆچی دواییی نووسەر، وەرگێڕ و چیرۆکنووسی ناوداری كوردستان خوالێخۆشبوو مامۆستا جەلیل کاکەوەیس، پرسە و سەرەخۆشیم ئاراستەی بنەماڵە و کەسوکاری بەڕێزیان و تەواوی نووسەران و رووناکبیرانی کوردستان دەکەم، هاوخه‌ميانم.
خوالێخۆشبوو مامۆستا جەلیل کاکەوەیس خاوەنی پێگەیەکی دیار و خزمەتێکی گەورە بوو لە بزووتنەوەی وێژه‌يى و فەرهەنگیی کوردستاندا. بە بەرهەم و وەرگێڕانە دەوڵەمەندەکانی، بەتایبەتی لە بواری چیرۆک و وێژه‌ى هاوچەرخدا، خزمه‌تێكى زۆرى پێشکەش کردووە.
لە خوای مەزن داواکارم گیانی بە بەزەیی و ميهره‌بانيى خۆی شاد بکات و ئارامی و دڵنەوایی بە خێزان و کەسوکار و دۆستانی ببەخشێت.
نێچیرڤان بارزانی
سەرۆکی هەرێمی کوردستان
10ی تشرینی یەکەمی 2026
