نرخی ماسیی تەقتەق بۆ کەمتر لە نیوە دابەزی؛ بەغدا رێگری لە هەناردەکردنی دەکات

رووداو دیجیتاڵ

کەرتی بەخێوکردنی ماسی لە شارۆچکەی تەقتەق تووشی قەیرانێکی گەورە بووە؛ نرخی ماسی زیاتر لە 50٪ دابەزیوە و قایمقامی قەزاکەش رایدەگەیێنێت، لە بازگەکانی عێراق رێگری لە ساخکردنەوەی بەرهەمەکانیان دەکرێت و پێدانی مۆڵەتیش لە 500ـەوە بۆ تەنیا 25 پڕۆژە دابەزیوە.

ئاسۆ مستەفا، قایمقامی قەزای تەقتەق لە پارێزگای هەولێر، ئەمڕۆ دووشەممە 26ی تشرینی یەکەمی 2026 بە تۆڕی میدیایی رووداوی راگەیاند: "ئەمساڵ کەمترین مۆڵەتمان داوە، لە کاتێکدا ساڵانی رابردوو 100 بۆ 500 مۆڵەت دەدرا، بەڵام ئەمساڵ تەنیا 25 مۆڵەت دراوە و چەندین وەبەرهێنیش بەهۆی گرانیی تێچووی گاز و ئالیکەوە پڕۆژەکانیان راگرتووە."

کیلۆیەک ماسی لە 8000 دینارەوە بۆ 3500 دینار دابەزیوە

قایمقامی تەقتەق لەبارەی دابەزینی نرخەکانەوە گوتی: "پار کیلۆی ماسی بە 8,000 دینار بوو، کەچی ئەمساڵ بۆ 3,500 دینار دابەزیوە، ئەمەش لە کاتێکدایە ماسیی تەقتەق بەهۆی پاکیی ئاوەکەی کە راستەوخۆ لە زێی بچووکەوە دێت خاوەن کوالیتی و تامێکی ناوازەیە."

سەبارەت بە نەخۆشییەکان، قایمقام ئاماژەی بەوە کرد نەخۆشیی کەڕوو لە حەوزەکاندا سەریهەڵدا، بەڵام توانرا بە زوویی کۆنتڕۆڵ بکرێت و رێگری لە زیانی گەورەتر بگیرێت.

ئاسۆ مستەفا ئاشکرای کرد کە یەکێک لە هۆکارە سەرەکییەکانی پاشەکشەی ئەم کەرتە، رێگرییەکانی حکومەتی فیدراڵە لە بازگەکانی کەرکووک و ناوچەکانی دیکەی عێراق کە ناهێڵن ماسیی هەرێمی کوردستان ببرێتە خواروو و ناوەڕاستی وڵاتەکە یان پارەی زیادەیان لێ دەستێنن. گوتیشی: "لە لایەکی دیکەشەوە رێگە دراوە ماسیی ئێران بە نرخێکی زۆر هەرزانتر لە ماسیی خۆماڵی هاوردەی عێراق بکرێت، ئەمەش وایکردووە بەرهەمی ناوخۆ نەتوانێت رکابەری بکات و زیانی گەورە بەر بەرهەمهێنەرانی تەقتەق بکەوێت."

بەگوێرەی ئاماری بەڕێوەبەرایەتیی سامانی ئاژەڵ، هەرێمی کوردستان ساڵانە پێویستی بە نزیکەی 80 هەزار تۆن ماسییە، زۆرینەی بەرهەمی نێوخۆیە و ئەوەشی دەمێنێتەوە بە شێوەی زیندوو و بەستوو هاوردە دەکرێت.
 
بەپێی ستانداردی جیهانی، هەر تاکێک ساڵانە پێویستە 16 کیلۆ و نیو ماسی بخوات، لەسەر ئەو بنەمایەش بەڕێوەبەراییەتی سامانی ئاژەڵ پێویستیی نێوخۆ دیاری دەکات.