رووداو دیجیتاڵ
کاسبکاران و دووکاندارانی عەلوەی نموونەیی کەرکووک دژی بڕیاری دروستکردنی عەلوەیەکی نوێ لە شارەکە خۆپێشاندانیان کرد و رایانگەیاند، کردنەوەی ئەو شوێنە بژێویی دوو هەزار خێزان دەخاتە مەترسییەوە. پارێزگاری کەرکووکیش بڕیاری دا رێکارەکانی مەزادکردنی عەلوە نوێیەکە رابگیرێ.
رۆژی یەکشەممە، 24ـی ئایاری 2026، کاسبکارانی عەلوەی کەرکووک لە دژی بڕیارێکی بەڕێوەبەرایەتیی شارەوانیی شارەکە بۆ دروستکردنی عەلوەیەکی دیکە لە رۆژهەڵاتی کەرکووک گردبوونەوە.
یەکێک لە کاسبکارە بەشداربووەکانی خۆپێشاندانەکە بە رووداوی گوت: "کەرکووک پێویستی بە دوو عەلوە نییە. ئێستا بژێویی نزیکەی دوو هەزار خێزان لەسەر ئەم عەلوەیەیە، ئەگەر شوێنێکی دیکە بکرێتەوە، زیانێکی زۆر بە کار و کاسبیمان دەگات، بۆیە داوا دەکەین مەزادەکە رابگیرێت."
خۆپێشاندانەکە گرژیی لێکەوتەوە کاتێک هێزە ئەمنییەکان هەوڵیاندا خێوەتی مانگرتنی کاسبکاران لابدەن. کاسبکارێکی دیکە گوتی: "دەیانەوێت بە زۆر خێوەتەکەمان پێ هەڵبگرن و رزقی منداڵەکانمان ببڕن، ئەمە زوڵمێکی گەورەیە."
دوای ئاڵۆزبوونی دۆخەکە، محەممەد سەمعان، پارێزگاری کەرکووک گەیشتە شوێنی گردبوونەوەکە و پشتیوانیی خۆی بۆ داواکاریی کاسبکاران دەربڕی.
پارێزگاری کەرکووک لە نێو خۆپێشاندەراندا رایگەیاند: "کەرکووک بەرگەی دوو عەلوە ناگرێت." هەر لەوێدا رێنمایی دا بە بەڕێوەبەری شارەوانی و پێیگوت، "تەواوی رێکارەکانی فرۆشتن و مەزادی عەلوە نوێیەکە رابگرن."
محەممەد سەمعان بڕیاری دا دوای پشووەکانی جەژنی قوربان، کۆبوونەوەیەکی تایبەت بۆ یەکلاکردنەوەی یەکجاریی ئەو کێشەیە بکرێت.
ئەم ناڕەزایەتییە لە کاتێکدایە، دوو ساڵ لەمەوبەر کاسبکارانی عەلوەی "خان خورما" بە ناچاری گواسترانەوە بۆ عەلوەی نموونەیی کەرکووک، ئێستاش ترسیان هەیە دروستکردنی شوێنێکی نوێ لە رۆژهەڵاتی شارەکە، بازاڕەکەیان پەکبخات.