رووداو دیجیتاڵ
وەزارەتی دەرەوەی سعودیە بە تووندی سەرکۆنەی ئەو هێرشە دەکات کرایە سەر نووسینگەی مەسرور بارزانی، سەرۆکی حکومەتی هەرێمی کوردستان و رایگەیاندووە، "ئەمە پێشێلکارییەکی ئاشکرای سەروەریی عێراقە."
ئەمڕۆ سێشەممە، 18ـی ئابی 2026، وەزارەتی دەرەوەی سعودیە لە راگەیێندراوێکدا رایگەیاند: "بەتووندترین شێوە سەرکۆنەی ئەو هێرشە دڕندانانە دەکەین کە کرانە سەر هەرێمی کوردستان و نووسینگەی مەسرور بارزانی، سەرۆکی حکومەتی هەرێمی کوردستان."
وەزارەتی دەرەوەی سعودیە ئەو هێرشەی بە "پێشێلکارییەکی ئاشکرای سەروەریی کۆماری عێراق و یەکپارچەیی خاکەکەی" وەسف کردووە.
هەر لە راگەیێندراوەکەدا هاتووە، سعودیە هەموو ئەو کارە "دووژمنکارانەیە" رەتدەکاتەوە کە کەسایەتییە سیاسییەکان و ئاسایشی دامەزراوەکانی عێراق دەکەنە ئامانج و دەبنە هۆی تێکدانی سەقامگیریی وڵات.
سعودیە هەڵوێستی خۆی دووپاتکردووەتەوە و دەڵێت، "هەموو جۆرە دەستوەردانێک لە کاروباری ناوخۆی وڵاتان و پێشێلکردنی سەروەرییان رەتدەکەینەوە، چونکە ئەو کارە بنەماکانی دراوسێیەتیی باش و یاسا نێودەوڵەتییەکان پێشێل دەکات."
بەگوێرەی دژەتیرۆری کوردستان، کاژێر 00:28ی بەرەبەیانی دووشەممە 17-8-2026 دوو درۆنی بۆمبڕێژکراو لە جۆری (حەدید-110) لە دیوی سنووری ئێرانەوە ئاراستەی بارەگای نووسینگەی تایبەتیی سەرۆکوەزیرانی هەرێمی کوردستان و شوێنی حەوانەوەی بەڕێوەبەری ئاژانسی پاراستن لە قەزای پیرمامی پارێزگای هەولێر کران.
دژەتیرۆری کوردستان هەروەها رایگەیاند، هێرشەکە هیچ زیانێکی گیانیی لێ نەکەوتووەتەوە.
