رووداو دیجیتاڵ
بنیامین نەتەنیاهوو، سەرۆکوەزیرانی ئیسرائیل رایگەیاند، کۆماری ئیسلامیی ئێران هەوڵی "تیرۆرکردنی" یەکێک لە دوو کوڕەکەی داوە، بەڵام وردەکاری زیاتری دەربارەی کات و شوێنی رووداوەکە ئاشکرا نەکرد.
رۆژی دووشەممە، 24ی ئابی 2026، نەتەنیاهوو لە چاوپێکەوتنێکی تەلەفۆنیدا لەگەڵ کەناڵی 14ی ئیسرائیل گوتی: "شتێکی باوەڕپێنەکراو روویدا؛ ئێران یەکێک لە کوڕەکانمی کردە ئامانج. ئێران هەوڵی کوشتنی یەکێک لە کوڕەکانمی داوە."
ئەم لێدوانەی نەتەنیاهوو لە کاتێکدا هات کە باس لەو راپۆرتانە دەکرا کە گوایە دەزگای ئاسایشی ناوخۆی ئیسرائیل (شین بێت) رەتیکردووەتەوە تیمی پاراستن بۆ گادی ئایزێنکۆت، سەرۆک ئەرکانی پێشووی سوپا دابین بکات. ئایزێنکۆت ئێستا رکابەرێکی سەرسەختی نەتەنیاهوویە بۆ هەڵبژاردنەکانی 27ی تشرینی یەکەم.
نەتەنیاهوو پشتگیریی خۆی بۆ دابینکردنی پاسەوانی 24 کاژێری بۆ ئایزێنکۆت دەربڕی و گوتی: "ئەمە کات بەسەربردن و لۆکس نییە، بەبێ ئەوە ئێرانییەکان سەرکەوتوو دەبن."
سەرۆکوەزیرانی ئیسرائیل دوو کوڕ و کچێکی هەیە، بەڵام ئاماژەی بەوە نەکرد کام لە کوڕەکانی کراوەتە ئامانج. یائیر نەتەنیاهوو (37 ساڵ)، کوڕە گەورەی نەتەنیاهوو، لە سەرەتای 2024ەوە لە شاری میامیی ئەمریکا دەژیت و لەژێر پاراستنی تووندی دەزگای (شین بێت)دایە.
مانەوەی یائیر لە ئەمریکا لە ناوخۆی ئیسرائیلدا مشتومڕێکی زۆری دروست کردووە بەهۆی تێچووە زۆرەکەی بۆ باجدەران و مەترسیی ئەوەی شوێنی نیشتەجێبوونەکەی ببێتە ئامانجی دووژمنانی ئیسرائیل.
هاوکات لەگەڵ قسەکانی نەتەنیاهوو، عەمیت سێگال، رۆژنامەڤانی ناوداری ئیسرائیلی، لە تێلیگرامەکەی نووسیویەتی کە هەوڵی تیرۆرکردنی کوڕەکەی نەتەنیاهوو "چەندین مانگە" زانراوە، بەڵام بەهۆی فەرمانی سانسۆری ئەمنییەوە رێگە بە بڵاوکردنەوەی نەدراوە.
ئەم پەرەسەندنە لە کاتێکدایە کە گرژییەکانی نێوان تاران و تەلئەڤیڤ گەیشتووەتە لوتکە. ئیسرائیل و ئەمریکا لە یەکەم رۆژی جەنگەکەدا لە 28ی شوباتی رابردوو، عەلی خامنەیی، رێبەری باڵای ئێران و چەند ئەندامێکی خێزانەکەی کوشت.
دوای هەفتەیەک، موجتەبا خامنەیی وەک رێبەری نوێی ئێران دەستنیشانکرا. موجتەبا لە پەیامێکدا رایگەیاند کە جگە لە باوکی، هاوژینەکەی، خوشکەکەی، منداڵی خوشکەکەی و زاوایەکەشی لە هێرشەکەدا کوژراون. موجتەبا خامنەیی کە وا بڕوا دەکرێت لە هەمان هێرشدا بریندار بووبێت، سوێندی خواردووە کە "تۆڵەی خوێنی" باوکی و کەسوکاری بکاتەوە.
