رووداو دیجیتاڵ
دۆناڵد ترەمپ، سەرۆکی ئەمریکا پشووی کۆتایی هەفتەی خۆی لە کەمپ دەیڤید کورتکردەوە و بەرەبەیانی رۆژی یەکشەممە بە شێوەیەکی چاوەڕواننەکراو گەڕایەوە بۆ کۆشکی سپی، ئەوەش هاوکاتە لەگەڵ زیادبوونی گرژییەکان لە رۆژهەڵاتی ناوەڕاستدا.
ئیدارەی ئەمریکا هیچ روونکردنەوەیەکی نەداوە لەسەر ئەوەی بۆچی ترەمپ وەک ئەوەی پێشتر راگەیێندرابوو، شەوی یەکشەممە لە کەمپ دەیڤید کۆمەڵگەی سەرۆکایەتی لە ناوچە گوندنشینەکانی مێریلاند ناگەڕێتەوە کۆشکی سپی.
ئەم گۆڕانکارییە لە پلانەکەدا دوای ئەوە هات کە هاوپەیمانێتیی بە سەرۆکایەتیی سعودیە دژی حووسییەکانی یەمەن رۆژی شەممە رایگەیاند، ئەو گرووپەی لەلایەن ئێرانەوە پاڵپشتی دەکرێت لە کاتی بەرەبەیاندا مووشەکێکی بالیستییان ئاراستەی ریاز کردووە، ئەوەش دوای کەوتنەوەی ئاگرێک لە نزیک فڕۆکەخانەی نێودەوڵەتیی پایتەختی سعودیە.
هاوکات وەزارەتی دەرەوەی ئەمریکا و زنجیرەیەک لە باڵیۆزخانەکانی ئەو وڵاتە هۆشداریی ئەمنییان ئاراستەی هاووڵاتییە ئەمریکییەکان کرد. لە هۆشدارییەکاندا ئاماژە بە "ئەگەری زیادبوونی گرژییەکان بە شێوەیەکی چاوەڕواننەکراو" کراوە و دەڵێت، "حووسییەکانی سەر بە ئێران دەستیان بە کردەوەی دوژمنکارانە کردووە دژی سعودیە، لەنێویاندا فڕۆکەخانە مەدەنییەکان."
لە ئاگادارییەکەی وەزارەتی دەرەوەی ئەمریکادا هاتووە: "ئەم ململانێ سەربازییە توانای ئەوەی هەیە بە خێرایی پەرەبسێنێت. پێویستە ئەو ئەمریکییانەی لە دەرەوەی رۆژهەڵاتی ناوەڕاستن، بە جددی بیر لە گەشتەکانیان بۆ ناوچەکە یان بە ناو ناوچەکەدا بکەنەوە."
لە 3ـی ئەیلوولەوە گرووپەکە هێرشێکی بەرفراوانیان بۆ کۆنترۆڵکردنی ناوچەی نوێ دەستپێکردووە و ژمارەیەک هێرشیشیان کردووەتە سەر سعودیە. هاوکات لە 29ـی تەممووزیشەوە هاتووچۆی کەشتییە نەوتییەکانی سعودیەیان بە تەنگەی بابلمەندەبدا قەدەخە کردووە.
جەنگی نێوخۆی یەمەن کە لە ساڵی 2014ـەوە بە دەستبەسەرداگرتنی سەنعای پایتەخت لەلایەن حووسییەکانەوە دەستیپێکرد، دوای هێوربوونەوەیەکی کاتی لە ساڵی 2022، لە تەممووزی ئەمساڵەوە بە سەختی سەریهەڵدایەوە و بەهۆیەوە زیاتر لە 500 کەس لە پێکدادانەکاندا کوژراون.
