رووداو دیجیتاڵ
هێزە چەکدارەکانی سەر بە حکومەتی یەمەن ئێوارەی ئەمڕۆ دووشەممە کۆنترۆڵکردنەوەی شاری بەندەریی مەخای سەر دەریای سووریان راگەیاند، دوای ئەوەی لە مانگی ئەیلوولی رابردوودا شارەکە کەوتبووە دەست چەکدارانی حووسی.
پێشتر لە سەرەتای رۆژی دووشەممەدا، حکومەتی یەمەن ئاشکرای کرد، هێزەکانیان بە پاڵپشتیی سعودیە، کۆنترۆڵی کردەییی خۆیان بەسەر تەنگەی بابولمەندەبدا سەپاندووە، هاوکات ئاماژەی بەوە کردبوو کە شەڕ و پێکدادان لەگەڵ چەکدارانی حووسی لە ناوچەکەدا بەردەوامە.
هێزەکانی حکومەتی یەمەن دەستپێکردنی ئۆپەراسیۆنێکی سەربازییان بە ئاراستەی سەنعای پایتەخت راگەیاندووە و بە هێرشێکی "ستراتیژی" وەسفیان کردووە، هەروەها جەختیان لە بەکارهێنانی توانست و کەرەستەی سەربازیی سەردەمییانە لە هێرشەکەدا کردووەتەوە.
لەلایەکی دیکەوە، هاوپەیمانیی پشتیوانی لە شەرعییەت لە یەمەن بە سەرۆکایەتیی سعودیە رایگەیاند کە 100 فڕۆکەی جەنگی بەشدارییان لەم ئۆپەراسیۆنەدا کردووە و توانیویانە 324 ئامانجی "خاوەن بایەخی باڵا" لە نێو خاکی یەمەندا تێکبشکێنن.
