.webp&w=3840&q=75)
رووداو دیجیتاڵ
قەتەر دەڵێ، ئەمریکا و ئێران سەرقاڵی گفتوگۆن بۆ کۆتاییهێنان بەو جەنگەی لە 28ی شوباتەوە دەستی پێکردووە.
رۆژی سێشەممە 06-10-2026 ئیبراهیم هاشمی، بەرپرس لە وەزارەتی دەرەوەی قەتەر لە کۆنفرانسێکی رۆژنامەڤانییدا رایگەیاند، لە گفتوگۆ ناڕاستەوخۆکاندا "نیگەرانیی لایەنە جیاوازەکان" لەبەرچاو دەگیرێ.
لە سەرەتای جەنگەکەوە قەتەر یەکێک بووە لە نێوەندگیرەکانی نێوان ئەمریکا و ئێران.
ئەو بەرپرسە گوتی: "دەتوانم ئەوە پشتڕاست بکەمەوە کە گفتوگۆکان بەردەوامن و گۆڕینەوەی پەیامەکانیش لە نێوان لایەنە جیاوازەکاندا لە رێگەی قەتەر و هاوبەشە هەرێمییەکانییەوە بەردەوامە."
ئیبراهیم هاشمی گوتی: "وەک دەزانن، ئەم ململانێیە و گەورەیی ئەو باجەی هەموو جیهان دەیدات، وامان لێدەکات باشترین هەوڵی خۆمان بدەین بۆ ئەوەی دەستبەجێ لە رێگەی چارەسەرێکی گونجاوەوە لەسەر مێزی دانوستاندن کۆتایی پێبێنین."
سەرباری راگەیاندنی ئاگربەست لە مانگی نیسان و یاداشتێکی لێکتێگەیشتن لە مانگی حوزەیران و گفتوگۆکانی مانگی رابردووی پەراوێزی کۆبوونەوەکانی کۆمەڵەی گشتیی نەتەوە یەکگرتووەکان، واشنتن و تاران هێشتا لەسەر تەنگەی هورمز و هەندێ بابەتی دیکە ناکۆکن.
لێدوانەکەی وەزارەتی دەرەوەی قەتەر لە کاتێکدایە، رۆژی دووشەممە مەسعود پزیشکیان، سەرۆککۆماری ئێران رایگەیاند، دانوستاندن لەگەڵ ئەمریکا "بێ مانایە."
