رووداو دیجیتاڵ
گوتەبێژی سەربازیی حووسییەکانی یەمەن رایگەیاند، لە سەرەتای دەستپێکردنی پەرەسەندنە سەربازییەکانەوە تاوەکو ئێستا فڕۆکە جەنگییەکان و هێزەکانی سعودیە هەزار و 857 هێرشی ئاسمانی و مووشەکییان کردووەتە سەر خاکی یەمەن، هاوکات تەنیا لەماوەی 24 کاژێری رابردوودا دەیان ناوچە لە سەنعا و 10 پارێزگای دیکە بۆردوومان کراون.
رۆژی پێنجشەممە، 8ی تشرینی یەکەمی 2026، یەحیا سەریع لە ئێکس ئاماژەی بەوە کرد، "لە 24 کاژێری رابردوودا فڕۆکە جەنگییەکانی سعودیە 59 هێرشی ئاسمانی و مووشەکییان بۆ سەر سەنعای پایتەخت و پارێزگاکانی (جەوف، تەعیز، مەئریب، حەججە، سەعدە، حودەیدە، لەحج، رەیامە، ئیب و بەیزا) ئەنجامداوە."
بە گوتەی سەریع، لەو هێرشانەدا فڕۆکەی جەنگیی لە جۆرەکانی ئێف 15 و تایفۆن بەکارهێنراون کە لە بنکە ئاسمانییەکانی خەمیس موشەیت و تائیفەوە هەستاون، هاوکات بەشێک لە هێرشە مووشەکییەکانیش لە ناوچەی نەجرانی سنوورییەوە ئاراستە کراون.
گوتەبێژی حووسییەکان ئاماژەی بەوەش کرد، "لە ئەنجامی ئەو بۆردوومان و پەلامارانەدا، ژمارەیەک هاووڵاتیی مەدەنی کوژراون و بریندار بوون کە ژن و منداڵیشیان لە نێودایە".
ئەم گرژییە لە کاتێکدایە کە لە چەند رۆژی رابردوودا ئاسمانی سعودیە و فڕۆکەخانەکانی ئەبها و شا خالید لە ریاز کەوتنە بەر هێرشی مووشەکی و درۆنیی حووسییەکان، کە بووە هۆی گیانلەدەستدانی سێ کەس و برینداربوونی دەیانی دیکە.
ئەم پێشهاتە سەربازی و دیپلۆماسییە لە کاتێکدایە کە شەڕی ناوخۆی یەمەن دوای چوار ساڵ ئاگربەست لە مانگی تەمووزی ئەم ساڵەوە بە تووندی سەریهەڵدایەوە؛ بەهۆی کۆنترۆڵکردنی ناوچە کەناراوییەکانی دەریای سوور لەلایەن حووسییەکان و هێرشە بەردەوامەکانیان بۆ سەر فڕۆکەخانەکانی شا خالید لە ریاز و ئەبها لە باشووری سعودیە، ریاز لە هەوڵی چڕکردنەوەی بەرگری و پتەوکردنی هاوپەیمانێتییە هەرێمییەکاندایە.
