رووداو دیجیتاڵ
میدیای فەرمیی حووسییەکان بڵاویکردەوە، ئەمڕۆ سێشەممە فڕۆکە جەنگییەکانی هاوپەیمانیی عەرەبی بە سەرۆکایەتیی سعودیە دامەزراوەیەکی نەوتییان لە نزیک سەنعای پایتەختی یەمەن بۆردوومان کردووە.
کەناڵی (ئەلمەسیرە)ی سەر بە حووسییەکان لە هەواڵێکدا بڵاویکردەوە، هێرشەکە بنکەی کۆمپانیای نەوتی یەمەنی لە ناوچەی سەباحە لە رۆژئاوای سەنعا کردووەتە ئامانج.
پێش ئەنجامدانی هێرشەکە، هاوپەیمانیی عەرەبی هۆشداریی بەپەلەی دابووە هاووڵاتیان بۆ چۆڵکردنی وێستگەی سەباحە.
ئەم ئۆپەراسیۆنەی سعودیە وەک وەڵامێک دێت بۆ زنجیرەیەک هێرشی کوشندەی ئەم دواییەی حووسییەکان بۆ سەر چەند ئامانجێک لە ناوخۆی سعودیە، بەتایبەت بۆردوومانکردنی فڕۆکەخانەی نێودەوڵەتیی شا خالید لە ریاز.
دوای هۆشدارییەکەی هاوپەیمانیی عەرەبی، هاووڵاتیان بە لێشاو بەرەو وێستگەکانی دابەشکردنی سووتەمەنی لە سەنعا چوون و نۆرەی درێژ دروستبوو لە ترسی نەمانی بەنزین. لە بەرامبەردا، کۆمپانیای نەوتی یەمەن هەوڵیدا دۆخەکە هێور بکاتەوە و رایگەیاند، تەواوی رێوشوێنە پێویستەکانی بۆ دۆخی لەناکاو گرتووەتەبەر.
کاردانەوەی حووسییەکان
لەگەڵ ئەم پێشهاتانەدا، یەحیا سەریع، گوتەبێژی سەربازیی حووسییەکان، پەیامێکی هۆشداری بڵاوکردەوە و داوای لە هاووڵاتیانی سعودیە کرد بەپەلە لە چەندین ئامانجی دیاریکراو دووربکەونەوە و گوتی، هێزەکانیان لە بەرامبەر بۆردوومانەکانی سەنعادا ئەو ناوچانە دەکەنە ئامانج. ئامانجە دیاریکراوەکانیش بریتین لە ناوەندی سەرەکی کۆمپانیای ئارامکۆ لە دەمام، فڕۆکەخانەی شا خالید لە ریاز، پاڵاوگەی ریازی سەر بە کۆمپانیای ئارامکۆ.
ئەم گرژییە مەترسیی فراوانتربوونی شەڕی نێوان سعودیە و حووسییەکان زیاتر دەکات، بەتایبەت دوای ئەوەی هێرشەکانی سەر هێڵە بازرگانی و فڕۆکەخانەکان لە ناوچەکەدا گەیشتوونەتە ئاستێکی هەستیار.
