رووداو دیجیتاڵ
وەزارەتی وزەی سعودیە دەڵێت، بەرگریی ئاسمانیی وڵاتەکەی هەوڵێکی بەئامانجگرتنی کێڵگەی نەوتیی شەیبەی سەر بە کۆمپانیای ئارامکۆی لە ناوچەی رۆژهەڵات پووچەڵکردووەتەوە، بەڵام بەهۆی کەوتنەخوارەوەی پاشماوەی درۆنەکە دوو کارمەند گیانیان لەدەستداوە و دووی دیکەش بریندار بوون.
بەپێی راگەیێندراوی وەزارەتی وزەی سعودیە، سیستمی بەرگریی ئاسمانی توانیویەتی درۆنێک تێکبشکێنێ هەوڵیدابوو یەکێک لە وێستگەکانی کێڵگەی شەیبە بکاتە ئامانج. بەهۆی کەوتنەخوارەوەی پارچە و پاشماوەی درۆنە تێکشکێنراوەکەش، ئاگر لە ئۆتۆمبێلێکی یەکێک لە بەڵێندەران لە کێڵگەکە و لە دەرەوەی دیواری وێستگەکە کەوتووەتەوە.
وەزارەتی وزە ئاماژەی بەوە کردووە، هێرشەکە هیچ کاریگەرییەکی لەسەر بەرهەمهێنان و پرۆسەی کارکردنی کێڵگەکە دروستنەکردووە؛ دەشڵێت، لە ئەنجامی کەوتنەخوارەوەی پاشماوەی هێرشەکە، دوو کارمەندی بیانی هەڵگری وڵاتینامەی فلیپینی و نیپاڵی گیانیان لەدەستداوە، دوو کارمەندی دیکەش کە هەڵگری وڵاتینامەی پاکستانی و هیندین بریندار بوون.
بە گوێرەی وەزارەتی وزەی سعودیە، "لایەنە پەیوەندیدارەکان دەستبەجێ رێکاری پێویستیان بۆ چارەسەرکردنی رووداوەکە گرتووەتەبەر".
سەرەتای مانگی ئەیلوول، حووسییەکان دەستیان بە ئۆپەراسیۆنێک بۆ کۆنترۆڵکردنی ناوچەیەکی فراوانتر لە خاکی وڵاتەکەیان کرد و رایانگەیاند، هەموو هەوڵێک دەدەن بۆ دەرکردنی هێزەکانی سعودیە لە خاکی وڵاتەکەیان.
لەو کاتەوە بە گوتەی حووسییەکان، سعودیە دەستی بە هێرشکردنە سەر هێزەکانیان کردووە و ئەوانیش بە مووشەک و درۆن هێرشیانکردووەتە سەر ناوچەکانی باشوور و ریازی پایتەختی سعودیە. بە گوێرەی یەحیا سەریع، گوتەبێژی حووسییەکان، لە دەستپێکی گرژییەکانەوە سعودیە نزیکەی دوو هەزار و 500 هێرشیکردوونەتە سەر.
