رووداو دیجیتاڵ
دوای ئەوەی ئەمریکا و ئیسرائیل هێرشێکی بەرفراوانیان بۆسەر ئێران دەستپێکرد، شارەوانیی تاران رایگەیاند، بڕیاری داوە بەکارهێنانی میترۆ و پاسەکان لە شارەکە بەخۆرایی بێت.
ئەمڕۆ شەممە، 28ی شوباتی 2026، عەبدولموتەهەر محەممەدخانی، گوتەبێژی شارەوانیی تاران رایگەیاند، لە پێناو ئاسانکاری بۆ هاتووچۆی هاووڵاتیان، شارەوانی بڕیاری داوە بەکارهێنانی میترۆ و پاسەکان لە تاران بەخۆڕایی بێت.
عەبدولموتەهەر محەممەدخانی گوتی: "لەمڕۆوە تاوەکو بڵاوکردنەوەی راگەیێندراوێکی دیکە، میترۆی تاران بە شێوەی 24 کاژێری لە کارکردن بەردەوام دەبێت. هەروەها پاسەکانیش لە هەموو ناوچە و گەڕەکەکان بێ وەستان لە کارکردن بەردەوام دەبن و بە هەموو تواناکانیانەوە لە گواستنەوەی هاووڵاتیان بەردەوام دەبن."
محەممەدخانی دڵنیایی دەداتە خەڵک و دەڵێت، خۆراکی پێویست لە بازاڕەکان و فرۆشگەکان هەیە و لە دابینکردنی خۆراک، سەوزە و میوە بۆ بازاڕەکان بەردەوام دەبن، بۆیە پێویست ناکات هاووڵاتیان نیگەران بن.
بەرەبەیانی ئەمڕۆ ئەمریکا و ئیسرائیل بە هاوبەشی هێرشێکی بەرفراوانیان بۆسەر ئێران دەستپێکرد و دۆناڵد ترەمپ و بنیامین نەتەنیاهووش پەیامی جیاوازیان لەبارەی هێرشەکە هەبوو.
سوپای پاسدارانی ئێرانیش لە راگەیێندراوێکدا بڵاویکردەوە، وەک وەڵامێک بۆ هێرشەکانی ئەمریکا و ئیسرائیل، ئۆپەراسیۆنی بەڵێنی راستگۆ-4یان دەستپێکردووە.
سوپای پاسداران گوتی، بارەگای کەشتیگەلی پێنجی هێزی دەریایی ئەمریکا لە بەحرێن، بنکەکانی ئەمریکا لە قەتەر و ئیمارات، ناوەندە سەبازی و ئەمنییەکان لە ئیسرائیل بە مووشەک و درۆن کراونەتە ئامانج.
.jpg&w=3840&q=75)