رووداو دیجیتاڵ
گوتەبێژی وەزارەتی دەرەوەی ئێران هۆشداری دەدات لە لێکەوتەکانی هێرشەکانی ئەمریکا و ئیسرائیل بۆ سەر وڵاتەکەی و ڕایدەگەیێنێت، تاران مافی ڕەوای خۆیەتی پەنا بۆ بەرگریی بکات.
ئیسماعیل بەقایی، گوتەبێژی وەزارەتی دەرەوەی ئێران لە هەژماری تایبەتی خۆی لە تۆڕی کۆمەڵایەتیی ئێکس بڵاویکردەوە: "ئێران لە چوارچێوەی یاسا نێودەوڵەتییەکاندا مافی رەوای خۆیەتی بەرگری لە خۆی بکات بەرامبەر ئەو شەڕە ناپەسەند و نایاساییەی ئەمریکا و ئیسرائیل دژی وڵاتەکەمان دەستیان پێکردووە."
گوتەبێژی وەزارەتی دەرەوەی ئێران رەخنەی توند لە هەڵوێستی واشنتن و تەلئەڤیڤ دەگرێت و دەڵێت: "ئەم شەڕە نایاساییە هەوڵە دیپلۆماسییەکانی لەناوبردووە، بنەماکانی یاسای نێودەوڵەتیی تێکشکاندووە و هێرشێکی وێرانکەرە بۆ سەر مرۆڤایەتی."
بەقایی لە پەیامەکەیدا داوای هەڵوێست لە کۆمەڵگەی نێودەوڵەتی دەکات و دەنووسێت: "بێدەنگی و بێباکی لە ئاست ئەم پێشێلکارییە زەقانەدا متمانەی سیستمی یاسایی جیهانی لەنێودەبات و دەستدرێژکارانیش بۆ هێرشی زیاتر بوێرتر دەکات."
ئەم لێدوانانەی گوتەبێژی وەزارەتی دەرەوەی ئێران لە کاتێکدایە کە گرژییە سەربازییەکانی ناوچەکە گەیشتوونەتە ئاستێکی مەترسیدار و مەترسیی فراوانبوونی شەڕی نێوان تاران و واشنتن لە ئارادایە.
.jpg&w=3840&q=75)