رووداو دیجیتاڵ
پەیوەندییە گشتییەکانی سوپای پاسدارانی ئێران، ئەمڕۆ دووشەممە رایگەیاند، هێزەکانی بەرگریی ئاسمانیی سەر بەو دامەزراوەیە توانیویانە دوو درۆنی ئیسرائیلی لە جۆری "هێرمس" لە ئاسمانی شارەکانی تەورێز و خوڕەم ئاوا تێکبشکێنن.
سوپای پاسداران ئاماژەی بەوەش کردووە، "بەرەبەیانی ئەمڕۆ، دوو درۆن لە جۆری هێرمس، لەلایەن سیستمە پێشکەوتووەکانی هێزی ئاسمانیی سوپای پاسدارانەوە دەستنیشان کران و خرانە خوارەوە."
بەپێی بەیاننامەکە، یەکێک لە درۆنەکان لە ئاسمانی تەورێز (باکووری رۆژئاوای ئێران) و ئەوی دیکەیان لە ئاسمانی خوڕەم ئاوا (رۆژئاوای ئێران) پێکراون.
سوپای پاسداران ئامارێکی نوێی بڵاوکردووەتەوە و دەڵێت: "لە سەرەتای دەستپێکردنی هێرش و ئاڵۆزییەکانی ئەم دواییەی ئیسرائیل و ئەمریکا، تاوەکو ئێستا 17 درۆنی جۆری هێرمس و درۆنێکی ئەمریکی لە جۆری MQ-9 لەلایەن هێزەکانمانەوە تێکشکێنراون."
