رووداو دیجیتاڵ
وەزیری دەرەوەی سعودیـە، داوای هاوئاهەنگیی جیدیی نێودەوڵەتیی بۆ پاراستنی کەشتیوانیی نێودەوڵەتی کرد. پشتگیریی سعودیـەی بۆ "سەروەری، ئاسایش و سەقامگیریی عێراق" دووپاتکردەوە و جەختی لەوە کردەوە "نابێ خاکەکەی ببێتە سەرچاوەی دەستدرێژیکردنە سەر وڵاتانی دراوسێ."
ئەم گوتانەی شازادە فەیسەڵ بن فەرحان، ئەمڕۆ شەممە، 26ـی ئەیلوولی 2026، لە گوتارێکیدا بوو کە لە 81ـەمین خولی کۆمەڵەی گشتیی نەتەوە یەکگرتووەکان لە نیویۆرک پێشکێشی کرد.
وەزیری دەرەوەی سعودیـە ئاماژەی بەوە کرد، "شانشین و وڵاتانی ناوچەکە رووبەڕووی دەستدرێژیی زۆردارانەی ئێران بوونەتەوە" و پێداگری لە "مافی تەواوی شانشین بۆ پاراستنی ئاسایش و سەروەریی خۆی" کردەوە و داوای لە کۆمەڵگەی نێودەوڵەتی کرد بەرپرسیارێتیی خۆی لە ئەستۆ بگرێت.
شازادە فەیسەڵ بن فەرحان باسی لە ئاسایشی ناوچەی کەنداوی عەرەبی کرد و بە "بەشێکی دانەبڕاوە لە ئاسایشی ناوچەکە و جیهان"ی ناساند و گوتیشی، "هەوڵەکانی گەڕاندنەوەی ئاسایش و سەقامگیری ناتوانرێت لەسەر بنەمای هەژموونگەرایی و قۆستنەوەی قەیرانەکان بێت، بەڵکو دەبێت لەسەر بنەمای رێزگرتنی دوولایەنە و دراوسێیەتیی باش بێت."
شازادە فەیسەڵ بن فەرحان جەختی لە رەتکردنەوەی وڵاتەکەی بۆ "هەموو ئەو کردەوە تیرۆریستییانەی میلیشیاکانی حووسی دەیکەن و هەڕەشەن بۆ سەر کەشتیوانی لە بابولمەندەب و دەریای سوور" کردەوە. گوتیشی، "پاراستنی کەشتیوانیی نێودەوڵەتی بەرپرسیارێتییەکی هاوبەشە و پێویستی بە هاوئاهەنگیی جدیی نێودەوڵەتی هەیە."
وەزیری دەرەوەی سعودیـە داوای گەڕانەوەی کەشتیوانیی لە تەنگەی هورمزی بۆ دۆخی ئاسایی خۆی کرد، هەروەک چۆن پێش هەڵگیرسانی شەڕ لەگەڵ ئێران لە کۆتایی مانگی شوباتی رابردوودا بوو. هەروەها داوای کرد باج نەسەپێندرێت بەسەر ئەو کەشتییانەی بەوێدا تێدەپەڕن.
سەبارەت بە پرسی فەلەستین، شازادە فەیسەڵ بن فەرحان گوتی، "رێگریکردن لە گەیشتنی هاوکارییە مرۆییەکان بە کەرتی غەززە و هەوڵەکانی ئاوارەکردنی فەلەستینییەکان، پێشێلکاریی یاسای نێودەوڵەتین." رایگەیاند، ئاشتیی دادپەروەرانە و هەمیشەیی بەدی نایەت، مەگەر بە چارەسەری دوو دەوڵەت و دامەزراندنی دەوڵەتێکی سەربەخۆی فەلەستین بە پایتەختیی قودسی رۆژهەڵات.
لەبارەی دۆسیەی سووریاش، وەزیری دەرەوەی سعودیـە رەتکردنەوەی وڵاتەکەی بۆ "هەر پێشێلکارییەک کە زیان بە ئاسایش و سەقامگیریی سووریا بگەیێنێت" دووپاتکردەوە و پێشوازیی لە بڕیاری ئەمریکا بۆ دەرکردنی ناوی سووریا لە لیستی وڵاتانی پشتیوانی تیرۆر کرد.
سەبارەت بە عێراق، شازادە فەیسەڵ بن فەرحان پشتگیریی سعودیـەی بۆ "سەروەری، ئاسایش و سەقامگیریی عێراق" دووپاتکردەوە و جەختی لەوە کردەوە کە "نابێت خاکەکەی ببێتە سەرچاوەی دەستدرێژیکردنە سەر وڵاتانی دراوسێ."
هەروەها پشتگیریی وڵاتەکەی بۆ لوبنان و پاراستنی سەروەری و سەقامگیرییەکەی دووپات کردەوە.
لەبارەی دۆسیەی وزەوە، شازادە فەیسەڵ بن فەرحان گوتی، "دڵنیابوون لە سەقامگیریی دابینکردنی وزە و پاراستنی ژێرخانەکەی، بەرپرسیارێتییەکی هاوبەشە."
جەختی لەوەش کردەوە کە سعودیـە بەهۆی وەبەرهێنانە درێژخایەنەکانی لە ژێرخاندا، بەردەوامی بە هەناردەکردنی وزە داوە.
