رووداو دیجیتاڵ
سەرۆکایەتیی کۆماری تورکیا دیدگایەکی نوێ بۆ داهاتووی رۆژهەڵاتی ناوەڕاست دەخاتەڕوو و رایدەگەیێنێت، سەردەمی دەستێوەردانی وڵاتانی دەرەکی لە کاروباری ناوچەکە کۆتایی هاتووە و دەبێت وڵاتانی ناوچەکە خۆیان خاوەندارێتی لە داهاتووی خۆیان بکەن.
بورهانەدین دوران، لە فەرمانگەی پەیوەندییەکانی سەرۆکایەتیی کۆماری تورکیا، لە پۆستێکدا وردەکاریی نوێی دەربارەی دیدگای رەجەب تەییب ئەردۆغان، سەرۆککۆماری تورکیا بۆ قۆناخی داهاتوو بڵاوکردەوە.
دوران ئاماژەی بە هەڤپەیڤینێکی ئەردۆغان لەگەڵ رۆژنامەی (شەرقولئەوسەت) کردووە و دەڵێت: "ستراتیژیی تورکیا ئەوەیە کە گفتوگۆ بخاتە شوێنی ململانێ و دیپلۆماسی لەبری گرژی بەکاربهێنرێت."
سەبارەت بە "رێککەوتنی مەککە بۆ بەرگریی هاوبەش" کە لە نێوان تورکیا، سعوودیە و پاکستان واژۆ کراوە، بورهانەدین دوران روونیکردەوە کە ئەم هەنگاوە دژی هیچ وڵاتێک نییە، بەڵکو ئامانج لێی پاراستنی ئاشتی و بەرگرییە لە ناوچەکە و دەڵێت: "ئەم رێککەوتنە لەسەر ئەو بنەمایەیە کە ئاسایشی یەکێکمان، ئاسایشی هەموومانە."
رۆژی سێشەممە، 11ـی ئابی 2026، رەجەب تەییب ئەردۆغان لە وەڵامی پرسیارێکی رۆژنامەی (شەرقولئەوسەت)دا، رەتیکردەوە رێککەوتنە بەرگرییەکە تەنیا کاردانەوە بێت بۆ گرژییەکانی نێوان ئەمریکا و ئێران و رایگەیاند: "نابێت تەنیا لە رووە سەربازییەکەیەوە سەیری ئەم رێککەوتنە بکرێت، ئامانجی سەرەکی بەهێزکردنی توانای رێگریکردن و پتەوکردنی هەستی ئاسایشە."
سەرۆککۆماری تورکیا جەختی لەوەش کردەوە کە رێککەوتنەکە "هیچ وڵاتێک ناکاتە ئامانج" و دەرگای کراوەیە بۆ هەموو ئەو وڵاتە دۆستانەی دەیانەوێت بەشدار بن. ئاماژەی بەوەش کرد، تورکیا دەیەوێت لە کەنداوەوە تاوەکو سووریا و لوبنان، سیستمێک هەبێت کە رێز لە سەروەریی خاکی وڵاتان بگرێت.
ئەردۆغان باسی لە گرنگیی تەنگەی هورمز کرد وەک یەکێک لە دەمارە سەرەکییەکانی ئابووریی جیهان و گوتی: "هیوا و چاوەڕوانیمان ئەوەیە گرژیی ئێستا بە زووترین کات کۆتایی بێت و تەنگەی هورمز بە شێوەیەکی ئارام بگەڕێتەوە بۆ خزمەتکردنی بازرگانیی نێودەوڵەتی."
بورهانەدین دوران لە کۆتایی پەیامەکەیدا ئاماژەی بەوە کرد، تورکیا وەک کاراکتەرێکی بەهێز بەرپرسیارێتی دەگرێتە ئەستۆ بۆ ئەوەی چیدی چارەنووسی رۆژهەڵاتی ناوەڕاست بە "شەڕ و ناسەقامگیری" نەنووسرێتەوە، بەڵکو ئاشتی و برایەتی جێگەی بگرێتەوە.
