رووداو دیجیتاڵ
لە سربیا، بزووتنەوەیەک کە لەلایەن خوێندکارانەوە سەرکردایەتی دەکرێت، توانی لە هەڵبژاردنی پەرلەمانیدا زۆرینەی دەنگەکان بەدەستبهێنێت، ئەمەش ئەلێکساندەر ڤوچیچ، سەرۆکە تووندڕۆکەی ناچار کرد دۆڕانی خۆی قبووڵ بکات و دەستبەرداری کورسییەکەی ببێت.
ئەم سەرکەوتنە گەورەیەی خوێندکاران ئەنجامی دوو ساڵ خۆپێشاندانی بەرفراوان بوو. خەڵکی سربیا لە گەندەڵی تووڕە بوون و ناڕەزایەتییەکان کاتێک تەقینەوە کە لە ساڵی 2024دا بەشێک لە سەربانی وێستگەی شەمەندەفەری شارۆچکەی (نۆڤی ساد) رووخا و 16 کەس گیانیان لەدەستدا. خەڵک حکومەتەکەی ڤوچیچیان بە بەرپرسی گەندەڵییەکە دەزانی، کە بووە هۆی گەورەترین خۆپێشاندان لەو وڵاتە لە دوای ساڵی 2000ـەوە.
ئەنجامی هەڵبژاردنەکە چۆن بوو؟
رێژەی بەشداریی خەڵک لە هەڵبژاردندا زۆر بەرز بوو و گەیشتە نزیکەی 70%, ئەمەش گۆڕانکارییەکی گەورەی لە سیاسەتی سربیادا دروستکرد.
کاردانەوەکان
خەڵکی شەقام: هاووڵاتییان و خوێندکاران رژانە سەر شەقامەکانی بێلگرادی پایتەخت و بە ئاهەنگگێڕان، لێدانی هۆڕنی ئۆتۆمبێل و یاریی ئاگرین، سەرکەوتنی خۆیان پیرۆز کرد و گوتیان بۆیان دەرکەوت کە سربیا دەتوانێت ببێتە وڵاتی دادپەروەری و ئازادی.
ڤوچیچ، سەرۆکی دەستلەکارکشاوە: ناچار بوو دوای تەنیا دوو کاژێر لە داخستنی بنکەکانی دەنگدان، دۆڕانی خۆی رابگەیێنێت. ڤوچیچ کە لە ماوەی دەسەڵاتیدا پەیوەندییەکی نزیکی لەگەڵ رووسیادا هەبوو، وڵاتانی ئەورووپا و ئەمریکای بەوە تۆمەتبار کرد کە پشتگیریی ئەم "شۆڕشە"ی خوێندکارانیان کردووە.
ئاراستەی داهاتووی وڵات
لیستی خوێندکاران لە کەسانی شارەزا، ئەکادیمی و هونەرمەندان پێکدێت کە ئەزموونی سیاسیی پێشوویان نەبووە، بەڵام دروشمی سەرەکییان "بەرەنگاربوونەوەی گەندەڵی"یە. چاوەڕوان دەکرێت حکومەتی نوێی خوێندکاران چاکسازی لە دەزگاکانی وڵاتدا بکات و سربیا زیاتر نزیک بکاتەوە لە بە ئەندامبوون لە یەکێتیی ئەورووپا.
