رووداو دیجیتاڵ
پەرلەمانتاری دەم پارتی لە بازنەی رووها، وردەکاریی ئەو دیدارەی ئاشکرا کرد کە رۆژی 26ی شوبات لە دوورگەی ئیمراڵی لەگەڵ عەبدوڵڵا ئۆجەلان ئەنجامی داوە. رایگەیاند، لە دیدارەکەدا چەندین بابەت تاوتوێ کراون، لەوانە شەڕی رۆژهەڵاتی نێوەڕاست، پرۆسەی چارەسەری لە تورکیا، خۆبەڕێوەبەریی خۆجێی و زمانی کوردی.
عومەر ئۆجەلان، پەرلەمانتاری دەم پارتی لە بازنەی رووها کە هاوکات برازای ئۆجەلانە، بۆ میدیای نزیک لە دەم پارتی دوا. زانیاریی لەبارەی ناوەڕۆکی دیدارە دوو کاژێرییەکەی لەگەڵ عەبدوڵڵا ئۆجەلان لە زیندانی ئیمراڵی بڵاوکردەوە.
عومەر ئۆجەلان رایگەیاند، عەبدوڵڵا ئۆجەلان جووڵە سەربازییەکانی رۆژهەڵاتی نێوەڕاستی بە "قۆناخی دووەمی دەستوەردان لە ئێران" ناوبردووە.
هەڵسەنگاندنەکانی ئۆجەلان بەم شێوەیە گواسترانەوە: "پێشتر گوتبووی عێراق لەدەستچوو، پێکهاتەی ئێستای سووریا هەڵوەشایەوە و ئەگەر ئێرانیش خۆی دیموکراسیی نەکات، رووبەڕووی دەستوەردان دەبێتەوە. ئێستا ئێمە لە قۆناخی دووەمی ئەو دەستوەردانەداین. دەستوەردانی یەکەم شەڕێکی 12 رۆژە بوو؛ بەڵام ئەمجارەیان جوگرافیاکەی فراوانتر بووە و دەستوەردانێکی گەورەترە. لەم قۆناخەدا، پێویستە گەلەکەمان و دامەزراوەکانمان رێوشوێن بگرنەبەر. باجی هەڵوێستی شۆڤێنی و پۆپۆلیستی بۆ گەل، قورس دەبێت."
ئۆجەلان، هەڵسەنگاندنی بۆ پرۆسەی چارەسەری لە تورکیا کردووە و جەختی لەوە کردووەتەوە کە زەمینە رەخساوە، بەڵام زۆر خاوە و گوتی: "پرۆسەکە بە خاوی بەڕێوەدەچێت، بەڵام زەمینەیەکی رەخساندووە کە بواری بۆ سیاسەتی دیموکراسیی کردووەتەوە. تاوەکو ئێستا شتێک نەماوە نەیڵێین، پێویستمان بە هەنگاوی کرداری هەیە. کۆبوونەوە، کۆنفرانس و مشتومڕی تیۆری گرنگن، بەڵام دەبێت بە سیاسەتی کردەیی ئەنجام بەدەستبهێنین. ئەم ئەرکە هەم لە ئەستۆی میکانیزمی دەوڵەتە و هەم پێشەنگەکانی سیاسەتی دیموکراسیی لە گۆڕەپانەکەدا."
لە دیدارەکەدا ئۆجەلان باسی لە پێویستیی بەهێزکردنی خۆبەڕێوەبەرییە خۆجێیەکان کردووە و بە تایبەتی سەرنجی خستووەتە سەر دۆخی گەورەشارەوانیی مێردین و ئەحمەد تورک.
عومەر ئۆجەلان گوتی: "ئۆجەلان داوای رێکخستنی یاسایی کرد بۆ کاراکردنی خۆبەڕێوەبەریی خۆجێی. ئاماژەی بەوەدا کە پێویستە بەڕێز ئەحمەد تورک بۆ سەر کارەکەی بگەڕێندرێتەوە و گرنگییەکی زۆری بە کۆتاییهێنان بە دانانی قەییوم داوە."
عەبدوڵڵا ئۆجەلان، ئاماژەی بە بابەتەکانی "پێگە" و "مافی هیوا" کردووە کە دەوڵەت باخچەلی، سەرۆکی مەهەپەش باسی کردبوون و ئەم قسانەی کردووە: "مافی هیوا گرنگە. لە پەرلەمان باسی پرسی پێگەی من کرا. بێگومان پێگەی من گرنگە، چونکە پێگەی من لە هەمان کاتدا پێگەی کوردە. دەرچوونی من لێرە، دەرچوونی گەلە و دەرچوونی گەلیش دەرچوونی منە."
ئۆجەلان، رایگەیاندووە کە لە نزیکەوە چاودێریی پێشهاتەکانی رۆژئاوای کوردستان دەکات و گرنگی بەو دیپلۆماسییەتە دەدات کە بۆ لەسەرپێی خۆی وەستانی کوردی ناوچەکە بەڕێوەدەچێت. پەیامی ئەوەی داوە کە لە قۆناخێکدا کە پێکهاتەی دەوڵەتەکان تێکچوون، پێویستە بەرامبەر ئەو شەڕە دەروونییەی لەسەر گەل بەڕێوەدەچێت، وریا بن.
ئۆجەلان گوتی: "ئامرازی قۆناخی نوێ، سیاسەتی دیموکراسی و یاسایە؛ پێویستە هەمووان لە چوارچێوەی دەم پارتیدا بەشداریی چالاکییەکان بکەن." لەبارەی پاراستنی زمانی دایکیشەوە ئەم ئاگادارییەی دا:
"زمانی کوردی گرنگە. ئەگەر هۆش پارچە پارچە بووبێت، زمانيش پارچە پارچە بووە. ئەگەر هێزی سیاسیت نەبێت، هێزی کولتووریشت نابێت. ئەگەر هێزی رێکخراوەییت نەبێت، ناتوانیت زمان بەپێوە رابگریت. پێویستە خاوەندارێتی لە بەهاکانی خۆمان بکەین."
لە کۆتایی دیدارەکەدا، عەبدوڵڵا ئۆجەلان بە شێوەیەکی نوکتەئامێز گوتوویەتی: "کوردییەکەی من لە کوردییەکەی ئێوە باشترە."
.jpg&w=3840&q=75)
