دیاسپۆرانشینانی ئەڵمانیا هاوکاری بۆ رۆژئاوای کوردستان کۆدەکەنەوە

جاسم ئیسماعیل، بەڕێوەبەری کۆمەڵەی کوردانی لیڤەرکوزن دەڵێت، "لەناو ئەم کۆمەڵەیەدا لیژنەیەکی یارمەتی هەیە، کە هەرسێ مانگ جارێک یارمەتیی گەلەکەمان دەدات، هەر ئەندامێک لە سێ مانگ جارێک پارەیەکی دیاریکراو دەدات، ئەم پارەیە دەبەخشرێتە 10 ئەندامی کۆمەڵەکە کە لە عەفرینەوە تاوەکو دێرک بڵاوبوونەتەوە، هەریەکەیان لە شوێن و باژێری خۆی هاوکارییەکە دابەشدەکات."

ئەم رۆحی هاوکارییە تەنیا لە شارێکی ئەڵمانیا قەتیس نەبووە، بەڵکو لە سەرانسەری ئەڵمانیادا بڵاوبووەتەوە، لە شاری بۆخووم کۆمەڵەی رۆناهی بە هەمان شێوە چالاکە، بۆ ئەوان ناردنی هەر قوتوویەک یاخود هەر بڕە پارەیەک، نەک تەنیا هاوکارییەکە، بەڵکو پەیامێکی پشتگیری و هاوخەمییانە.

خوناو حاجۆ، بەڕێوەبەری کۆمەڵەی رۆناهی دەڵێت، "دوای رووداوە گەورەکان لە رۆژئاوای کوردستان، بەتایبەتی کارەساتەکان، کە سەرەتا لە سەرێ کانی دەستیپێکرد، ئەوکات من لە ئەنجوومەن بووم و من و هاوڕێیەکم خۆمان کۆکردەوە، دەستمان بە کۆکردنەوەی هاوکارییەکان کرد و پارەمان نارد بۆ لێقەوماوانی رۆژئاوای کوردستان، هەرچەندە بەڵگەنامەی فەرمیمان پێنەدەگەیشت کە پارەکە گەیشتووەتە دەست ئەوانەی پێویستن یان نا، بەڵام لە رێگەی تەلەفۆنەوە پێمان رادەگەیێندرا کە پارەکە گەیشتووەتە شوێنی گونجاو بۆ خەڵکی هەژار."

پاش رێوڕەسمێکی دوورودرێژ و پڕ لە ماندووبوون، ئەم یارمەتییانە دەگەنە رۆژئاوا، بەڵام چیرۆکەکە لەوێ کۆتایی نایەت، کەسانی دڵسۆز و خۆبەخش وەک عەبدوڵڵا مستەفا هەڵدەستن و ئەم ئەمانەتانە بەپێی پێویست لەگەڵ هەموو زەحمەتییەکاندا بەسەر خێزانەکاندا دابەش دەکەن. بەرامبەر بەم هەوڵە گەورەیە پێداویستییەکانی ئەوێ زۆر زیاترن، هەندێک لە هاووڵاتیان دەڵێن کە ئەم یارمەتییانە ناگەنە هەموو خێزانە هەژارەکان.

گوڵێ شێخمووس سلۆ، هاووڵاتی دەڵێت، "بەناوی کۆمەڵەیەکی ئەڵمانی بڵاونەکراوەتەوە، بەڵام رێکخراوێک لەوێ بوو گوایە پارەیان دەدا بە خەڵک، من چووم پێم گوتن منیش پێویستیم بەو پارەیەیە و ناوم بنووسم بۆ ئەوەی وەریبگرم، بەڵام ناوی منیان نەنووسی، من نازانم کام رێکخراو بوو یان ناوی چی بوو، بەگشتی رێکخراوی هاوکاریی لێرە هەن، بەڵام هیچیان نەهاتوونەتە لامان، دەڵێن هەژار زۆربوونە و هەر رێکخراوێک هاوکارییەکە دەدەنە کەسە هەژارەکانی نزیک لە خۆیان یان خزموکەسوکاریان."

لە ئەڵمانیاوە تاوەکو رۆژئاوای کوردستان هەوڵەکانی یارمەتیدان بێ وچان بەردەوامن، بەڵام دۆخەکە سەختە، پرسیارەکە ئەوەیە، ئایا پێویستە چی بکرێت بۆئەوەی ئەو یارمەتییانە بگەنە هەموو کەسێک و لە رێگاکان ون نەبن؟