زنار شینۆ

زنار شینۆ، خاوەن توانایەكی رۆژنامەڤانی بەرزە، رۆشنبیری و زمانزانینەكەی یارمەتی دەدەن بۆ ئەوەی بەرهەمی رۆژنامەڤانی ئاستبەرز بەرهەمبێنێت ، ئاگاداربوونی لە رووداوەكان وایكردووە بەشداریكردنە راستەوخۆیەكانی لە بوولتەنەكاندا جێگەی سەرنج بن. 
زنار شینۆ، لە 1ی ئایاری 2014ەوە لە رووداو كار دەكات. رووماڵی لە وڵاتانی ئەوروپا و كیشوەرەكانی دیكەدا ئەنجامداون.
رووماڵكردنی گەڕاندنەوەی مام جەلال سەرۆككۆماری پێشووتری عێراق و سكرتێری یەكێتی نیشتیمانی كوردستان بۆ سلێمانی لە 19ی تەممووزی 2014 ، دوای نزیكەی ساڵێك و شەش مانگ لە وەرگرتنی چارەسەری لە ئەڵمانیا، دەنگدانەوەیەكی گەورەی لەنێو رای گشتی باشووری كودستاندا هەبوو. زنار شینۆ زۆر سەركەوتووانە ئەو رووماڵەی لە ئەڵمانیا ئەنجامدا.
لە ساڵەكانی 2015-2016 كاروانی كۆچبەری هەزاران كەسی لە سووریا و وڵاتانی رۆژهەڵاتی نێوەڕاستەوە بەرەو ئەوروپا دەستیانپێكرد، ئەوە گەورەترین شەپۆلی كۆچبەری بوو لە دوای جەنگی جیهانی دووەمەوە لەجیهاندا. زنار شینۆ، رووماڵی ئەو شەپوڵە كۆچبەریەی كرد بۆ ئەوروپا، لە یۆنان، مەسەدۆنا، سربیا، هەنگاریا، نەمسا و ئەڵمانیا. زۆر چیرۆكی جێگەی سەرنج لەنێو ڤیتی و سپێشەڵ ریپۆرتەكانیدا جێكردەوە، بەتایبەتی چیرۆكی كۆچبەرانی كورد. 
رووماڵی گەڕەكانی دانوستاندنی نێوان حكومەت و ئۆپۆزیسیۆنی سووریای بە سەرپەرشتی نەتەوەیەكگرتووەكان لە جنێڤ و كازاخستان ئەنجامدا. بەردەوام پرسیاركردن سەبارەت بە مافی كوردانی رۆژئاوای كوردستان لە نوێنەرانی حكومەتی سووریا و بەرپرسانی نەتەوە یەكگرتووەكان، كێشەی رۆژئاوای كوردستانی دەكردە رۆژەڤ . لەسەر ئەوە زۆر دەستخۆشی لێكراوە لەلایەن خەڵك و پارتەكانی رۆژئاوای كوردستانەوە. 

رووماڵی هاوكارییەكانی ئەڵمانیای كردووە بۆ پێشمەرگە، لە سەرەتای شەڕی داعشەوە. بەردەوام رووماڵی سەردان و كۆبوونەوە فەرمییەكانی بەرپرسانی باڵای هەرێمی كوردستانی كردووە لە ئەوروپا. 
 لە حوزەیرانی 2018 رووماڵی یەكەم كۆبوونەوەی لەنێوان دۆناڵد ترەمپ، سەرۆكی ئەمریكا و كیم جۆنگ ئۆن، سەرۆكی كۆریای باكووری كرد لە سەنگاپوور. 
رووماڵی هەڵبژاردنەكانی وڵاتانی ئەوروپا لە برۆكسل و كۆبوونەوەكانی ئۆپێك و ناتۆی كردووە لە ڤیەننا، چەندین جار پرسیاری لە سەرۆك و گەورە بەرپرسانی ئەوروپا و جیهان كردووە لەو كۆنفرانسانەدا.
رووماڵێكی بەرفراوانی گشتپرسی كەتەلۆنیای كرد لە رۆژی 1ی ئوكتۆبەری 2017 و هێرشەكانی پۆلیسی بۆ رێگریكردن لە دەنگدان لەو رۆژەدا بە فراوانی رووماڵكرد. هەڤپەیڤینی لەگەڵ سەرۆكی سەربەخۆخوازی كەتەلۆنیا كارلێس پۆچدیمۆنت ئەنجامدا.
زنار شینۆ، لەساڵی 1983 لە شاری دهۆك لەدایكبووە. لە كۆتایی ساڵی 1999ـەوە نیشتەجێی ئەڵمانیایە. دیپلۆمی لەساڵی 2005 لە بواری ئای تی وەرگرتووە. لە ساڵی 2009 رۆژنامەڤانی لە زانكۆی كوێلنـی ئەڵمانیا خویندووە، بەڵام تەواوی نەكردووە.
 لە ساڵی 1998 دەستی بە كاری رۆژنامەڤانی كردووە، لە رادیۆ و تەلەڤزیۆنی نێوخۆیی دهۆك كاریكردووە، هەروەها لە تەلەڤزیۆنی كوردستان. چەندین گوتار و نووسینی لە زمانی ئەڵمانی وەرگێڕاوە بۆ رۆژنامەكانی كوردستان.
زمانەكانی عەرەبی، ئەڵمانی و ئینگلیزی دەزانێت.