رووداو دیجیتاڵ
سێ ئەندامی پەرلەمانی عێراق لەگەڵ فالح ساری، وەزیری دارایی کۆبوونەوە و یەکێک لەو پەرلەمانتارانە بە رووداوی گوت: "وەزیری دارایی پێیگوتین 600 ملیار دینار کۆکراوەتەوە و هەفتەی داهاتوو مووچە دەنێرین."
کۆبوونەوەکە پاشنیوەڕۆی ئەمڕۆ سێشەممە، 11ی ئابی 2026، لە بەغدا لە نێوان سێ پەرلەمانتاری فراکسیۆنی پارتی دیموکراتی کوردستان و فالح سارى، وەزیری دارایی بووە.
سەلوان ئاکرەیی، یەکێک لەو پەرلەمانتارانەی کە بەشدار بووە لەو کۆبوونەوەیە، بە تۆڕی میدیایی رووداوی گوت: "وەزیری دارایی پێیگوتین دابەشکردنى مووچەى دامەزراوەکانى حکومەتى فیدڕاڵى تەواو بووە و تاوەکو ئێستا 600 ملیار دینارمان بۆ مووچەی هەرێمی کوردستان کۆکردووەتەوە و دابەشکردنی مووچەی دامەزراوەکانی عێراق تەواو بووە."
بڕیارە بۆ ئەم مانگە وەزارەتی دارایی فیدراڵ 841 ملیار دینار وەک پارەی مووچە بنێرێت، بەو پێیەی 120 ملیار دیناری داهاتی نانەوتیی هەرێمی کوردستانی لێ دەبڕدرێت.
سەلوان ئاکرەیی گوتی: "وەزیری دارایی پێیڕاگەیاندین، ئەو بڕە پارەیەی تاوەکو ئێستا کۆکراوەتەوە دەستی لێ نادەن و بۆ مووچەی هەرێمی کوردستانە و بەڵێن بە خەڵکی خۆتان بدەن کە هەفتەی داهاتوو مووچە دەنێرم."
لە 28ی تەممووزەوە دابەشکردنی مووچەی ئەم مانگەی عێراق دەستی پێکردووە، بەڵام بەهۆی کەمیی داهات، دابەشکردنەکە دواکەوت، کە مانگانە زیاتر لە حەوت تریلیۆن دیناری پێویستە.
