رووداو - دیجیتاڵ
وەزارەتی دارایی عێراق بڕی 600 ملیار دیناری بۆ مووچەی فەرمانبەرانی هەرێمی کوردستان ئامادە کردووە و بەڵێنی داوە لە ناو هەفتەی داهاتوودا تەواوکاریی بڕە پارەکە رەوانەی هەولێر بکات. ئەمە لە کاتێکدایە کە عێراق بەهۆی وەستانی هەناردەی نەوتەوە لە تەنگژەیەکی قووڵی دارایی دایە و بۆ دابینکردنی نەختینە پەنای بۆ قەرزی دەرەکی بردووە.
پەرلەمانتارانی کورد لە بەغدا لە هەوڵی بەردەوامدان بۆ دابینکردنی شایستە داراییەکانی هەرێم. سەلوان ئاکرەیی، ئەندامی پەرلەمانی عێراق بە رووداوی راگەیاند: "لە گفتوگۆماندا لەگەڵ وەزیری دارایی، بەڵێنی پێداین کە هەفتەی داهاتوو مووچەی هەرێمی کوردستان بنێرێت. وەزیر ئاشکرای کرد کە تاوەکو ئێستا 600 ملیار دیناریان کۆکردووەتەوە و ئێستا خەریکی تەواوکردنی بڕەکەی دیکەن."
بەپێی رێککەوتنی هەولێر و بەغدا، دەبێت مانگانە حکومەتی فیدراڵ زیاتر لە 960 ملیار دینار بۆ هەرێمی کوردستان بنێرێت، بەو مەرجەی 120 ملیار دینار وەک داهاتی ناوخۆ لەو بڕە پارەیە بڕبدرێت.
کاریگەریی جەنگ لەسەر ئابووریی عێراق عێراق ئێستا بە یەکێک لە سەختترین قۆناخە داراییەکانیدا تێدەپەڕێت. مەنسوور بعێجی، ئەندامی پەرلەمانی عێراق هۆکارەکەی بۆ شەڕی نێوان ئێران و ئەمریکا دەگەڕێنێتەوە و دەڵێت: "عێراق زیاتر لە ئێران زەرەرمەندی ئەو شەڕە بوو. بەهۆی ئەوەی 95%ـی داهاتمان لەسەر نەوتە و هەناردەش لە تەنگەی هورمزەوەیە، لە 28ـی مانگی رابردووەوە نەمانتوانیوە یەک بەرمیل نەوت هەناردە بکەین، ئەمەش کورتهێنانێکی گەورەی دروست کردووە."
بژاردەی قەرز و سەردانی ئەمریکا بۆ تێپەڕاندنی قەیرانی نەختینە، وەزارەتی دارایی عێراق پڕۆژەیاسای قەرزی دەرەکیی پێشکەشی پەرلەمان کردووە. رووداو زانیویەتی کە لە سەردانەکەیدا بۆ واشنتن، حکومەتی عێراق بە فەرمی داوای دوو ملیار دۆلار قەرزی لە ئەمریکا کردووە تاوەکو بتوانێت شایستە داراییەکان و مووچەی فەرمانبەران دابین بکات.
راستییەکانی مووچە و دارایی عێراق:
- پارەی ئامادەکراو بۆ هەرێم: 600 ملیار دینار.
- وادەی ناردن: هەفتەی داهاتوو.
- پشتبەستن بە نەوت: 95%ـی داهاتی وڵات.
- هەناردە: بەهۆی کێشە لە تەنگەی هورمز، هەناردەی نەوت بەتەواوی پەکیکەوتووە.
- داواکاریی قەرز: 2 ملیار دۆلار لە ئەمریکا.
سەرەڕای ئەم تەنگژە قووڵە، حکومەتی عێراق هەوڵ دەدات لە رێگەی داهاتە نانەوتییەکان و قەرزەوە مووچەی مانگی تەممووزی فەرمانبەرانی عێراق و هەرێمی کوردستان دابین بکات تاوەکو رێگری لە پشێویی کۆمەڵایەتی بگرێت.
