رووداو دیجیتاڵ
راپۆرتی ساڵانەی سندووقی وەبەرهێنانی گشتیی سعودیە (PIF) بۆ ساڵی 2025 ئاشکرای دەکات کە ئەم سندووقە قۆناخی یەکەمی ستراتیژییە پێنج ساڵەییەکەی کە لە 2021ـەوە دەستیپێکردبوو، بە سەرکەوتوویی تەواو کردووە و قازانجەکانی بەراورد بە پار بۆ دوو هێندە بەرزبوونەتەوە.
ئامارە داراییەکان بۆ ساڵی 2025:
داهات: 9٪ زیادیکردووە و گەیشتووەتە 450 ملیار ریال (120 ملیار و 109 ملیۆن دۆلار).
قازانجی پوخت: گەیشتووەتە زیاتر لە 65 ملیار ریال (17.35 ملیار دۆلار) - (دوو هێندەی ساڵی پێشوو).
کۆی سەرمایە: تاوەکو کۆتایی ساڵ گەیشتووەتە نزیکەی 3.4 ترلیۆن ریال (907 ملیار و 492 ملیۆن دۆلار).
ئەم قازانجە زۆرە دەریدەخات کە ئەو کۆمپانیایانەی سندووقەکە وەبەرهێنانی تێدا کردوون، ئێستا گەورە بوون و قازانجی زۆر دەگەڕێننەوە.
وەبەرهێنان لە ناوخۆی سعودیە
لەنێوان ساڵانی 2021 بۆ 2025، سندووقەکە نزیکەی 750 ملیار ریال (200 ملیار و 182 ملیۆن دۆلار)ی لە ناوخۆی وڵاتدا خەرجکردووە، بەتایبەتی لە بوارەکانی ژێرخان، تەکنەلۆجیا، پیشەسازیی پێشکەوتوو و خزمەتگوزارییە داراییەکان.
بەپێی راپۆرتەکە، ئەم سندووقە لە ساڵی 2025ـدا بەتەنیا بەرپرس بووە لە 11٪ـی کۆی گشتیی بەرهەمی ناوخۆییی سعودیە بێجگە لە نەوت. ئەمەش مانای ئەوەیە سندووقەکە تەنیا کۆمپانیایەکی وەبەرهێنان نییە، بەڵکو بزوێنەری سەرەکیی گۆڕینی ئابووریی سعودیەیە بۆ ئەوەی چیدیکە تەنیا پشت بە نەوت نەبەستێت.
هەنگاوە زیرەکەکان
ژیریی دەستکرد: سندووقەکە کۆمپانیایەکی نوێی بە ناوی (Humain) بۆ ژیریی دەستکرد دامەزراندووە و زیاتر لە 100 ئەپڵیکەیشنی دیجیتاڵیی نوێی خستووەتە کار.
پارەدارکردن و قەرز: بۆ ئەوەی تەنیا پشت بە یەک سەرچاوە نەبەستێت، سندووقەکە یەکەمین قەواڵەی سەوزی بە یۆرۆ فرۆشت. لەهەمان کاتدا بەرزترین متمانەی دارایی (A+ و Aa3)ـی لەلایەن دامەزراوە جیهانییەکانەوە پێدراوە، کە وا دەکات بتوانێت بە ئاسانی قەرز لە بازاڕەکانی جیهان وەربگرێت.
پڕۆژەی ئێکسپۆ: کۆمپانیای (ئێکسپۆ 2030 ریاز)ـی دامەزراندووە بۆ سەرپەرشتیکردنی ئەو پێشانگە جیهانییە گەورەیەی کە بڕیارە لە پایتەخت بەڕێوەبچێت.
هەنگاوی داهاتوو
ئێستا سندووقەکە پێ دەنێتە قۆناخێکی نوێی 5 ساڵەوە. لەم قۆناخەدا بایەخ بە 6 سیستمی ئابووریی ناوخۆیی، وەبەرهێنان لە وزەی پاک، وەرزش، کاتبەسەربردن و ژیریی دەستکرد دەدات.
لەسەر ئاستی جیهانیش، وەبەرهێنانەکانی 12٪ زیادیکردووە و ئۆفیسی نوێی لە پاریس، پەکین و شانگەهای کردووەتەوە (پێشتریش لە لەندەن، نیویۆرک و هۆنگ کۆنگ ئۆفیسی هەبوو).
بەڵام راپۆرتەکە هۆشداریش دەدات کە مەترسییەکان هێشتا ماون، چونکە هەندێک لە سەرمایەکانیان بەهۆی گۆڕانکاری و دابەزینی بازاڕە داراییەکانی جیهانەوە زیانیان بەرکەوتووە. بۆیە گەورەترین ئاڵنگاریی 5 ساڵی داهاتوویان، پاراستنی ئەو قازانجە گەورەیە دەبێت لە کاتی فراوانبوونی زیاتریاندا.
