.jpg&w=3840&q=75)
رووداو دیجیتاڵ
وەزارەتی نەوتی عێراق دەڵێ، بەرهەمهێنانی رۆژانەی نەوت گەیشتووەتە زیاتر لە سێ ملیۆن بەرمیل نەوت و هەناردەی رۆژانەش لە رێگەی بەندەرەکانی باشوورەوە گەیشتووەتە دوو بۆ دوو ملیۆن و 200 هەزار بەرمیل.
سەلیم روکابی، گوتەبێژی وەزارەتی نەوتی عێراق ئەمڕۆ دووشەممە 24-08-2026 بە تۆڕی میدیایی رووداوی راگەیاند، "بەرهەمهێنانی رۆژانەی نەوت لە عێراق گەیشتووەتە زیاتر لە سێ ملیۆن بەرمیل."
بەهۆی دەستپێکردنی جەنگ لەنێوان ئیسرائیل و ئەمریکا لەگەڵ ئێران لە 28ی شوباتەوە، بەرهەمهێنانی نەوتی عێراق بۆ کەمتر لە نیوە دابەزی کە پێشتر رۆژانە زیاتر لە 4.5 ملیۆن بەرمیل بوو،ئەوەش کاریگەری لەسەر هەناردەکردن کرد.
سەلیم روکابی رایگەیاند، "تێکڕای هەناردەی نەوت لە رێگەی بەندەرەکانی باشوورەوە نزیکەی دوو ملیۆن بۆ دوو ملیۆن و 200 هەزار بەرمیلە؛ هەروەها هەناردەی رۆژانەى نەوت لە رێگەی بەندەری جەیهانی تورکیاوە لەنێوان 150 بۆ 180 هەزار بەرمیلە."
بەگوێرەی لێدوانی پێشتری بەرپرسانی وەزارەتی نەوتی عێراق، هەناردەی نەوت لە مانگی تەممووزدا نزیکەی 49 ملیۆن بەرمیل نەوت بووە، کە رۆژانە دەیکردە نزیکەی 1.6 ملیۆن بەرمیل.
