رووداو دیجیتاڵ
راوێژکارێکی باڵیۆزخانەی پاکستان لە عێراق رایدەگەیێنێت، قەبارەی ئاڵوگۆڕی بازرگانیی نێوان وڵاتەکەی و عێراق گەیشتووەتە 250 ملیۆن دۆلار. ئاماژە بەوەش دەکات کە پلانێکی فراوانیان هەیە بۆ زیادکردنی ئاڵوگۆڕەکە لە رێگەی کەرتی بیناسازی و هەناردەکردنی کاڵای جۆراوجۆر بۆ بازاڕەکانی هەرێمی کوردستان و عێراق.
زیشان عاسف، راوێژکاری بازرگانی و وەبەرهێنان لە باڵیۆزخانەی پاکستان لە بەغدا، رۆژی شەممە، 29ـی ئابی 2026، لە سێیەم رۆژی پێشانگەی نێودەوڵەتیی هەولێر بۆ بیناسازی بە رووداوی راگەیاند، ئامانجی سەرەکییان لێرە کارئاسانییە بۆ گەیشتنی بەرهەمەکانی پاکستان بە بازاڕەکانی ناوچەکە.
ئەو بەرپرسە پاکستانییە گوتی: "ناوچەکە گەشەیەکی بەرچاو بەخۆیەوە دەبینێت و داواکارییەکی زۆر لەسەر کەرتی بیناسازی هەیە. پاکستان توانایەکی زۆری هەناردەکردنی هەیە لە چیمەنتۆ، ئاسن و مۆبیلیات؛ دەمانەوێت بە کوالێتییەکی بەرز و نرخێکی گونجاو ئەم پێداویستییانە دابین بکەین."
سەبارەت بە هاوسەنگیی بازرگانی، زیشان عاسف روونیکردەوە کە باڵانسی بازرگانی لە بەرژەوەندیی عێراقدایە، چونکە پاکستان بڕێکی زۆر گازی شل (LPG) لە عێراقەوە هاوردە دەکات.
ئێستا پاکستان میوە، سەوزە و دەرمان هەناردەی عێراق دەکات، بەڵام راوێژکارە بازرگانییەکە ئاشکرای کرد کە دەیانەوێت هەناردەکانیان جۆراوجۆر بکەن و گوتی: "بەمزووانە تۆپی پێی پاکستانی دەهێنینە بازاڕی عێراق، کە لەسەر ئاستی جیهان پێشەنگین و تۆپەکانمان لە مۆندیالی رابردوودا بەکارهێنراون."
هەروەها ئاماژەی بەوەش کرد کە پاکستان دەیەوێت کەرەستەی نەشتەرگەری، بەرهەمە چەرمییەکان و قوماش بگەیێنێتە عێراق، جەختیشی کردەوە کە وڵاتەکەی گەورەترین هاوبەشی هەناردەکردنی قوماشە بۆ ئەمریکا و یەکێتیی ئەوروپا، ئێستاش دەیانەوێت پشکێکی گەورەیان لە بازاڕی هەرێمی کوردستان و عێراقدا هەبێت.
