رووداو دیجیتاڵ
وەزارەتی کشتوکاڵی عێراق پلان بۆ دابەزاندنی نرخی گۆشتی سوور، گۆشتی مریشک و هێلکە لە بازاڕە ناوخۆییەکاندا رادەگەیێنێت، ئەوەش لە رێگەی پشتگیریکردنی کێڵگە پەلەوەرییەکان و کەمکردنەوەی تێچووی بەرهەمهێنان.
رۆژی یەکشەممە، 6ی ئەیلوولی 2026، قوسەی حەتاب، گوتەبێژی وەزارەتی کشتوکاڵی عێراق بە تۆڕی میدیایی رووداوی راگەیاند، لە دوایین کۆبوونەوەی وەزارەتەکەیاندا بڕیاردراوە دەست بکرێت بە جێبەجێکردنی کۆمەڵێک رێکاری چڕ بۆ چارەسەرکردنی بەرزبوونەوەی نرخی هێلکە و بەرهەمە پەلەوەرییەکان.
ئاماژەی بەوەش کرد، پلانەکە دابینکردنی ئاسانکاریی دارایی و کارگێڕی بۆ خاوەن پڕۆژە و کێڵگە پەلەوەرییەکانی کەرتی تایبەت لەخۆدەگرێ.
گوتەبێژی وەزارەتی کشتوکاڵی عێراق دەڵێت: "ساڵانە پێویستمان بە 9 ملیار هێلکەیە، بەڵام ئێستا تەنیا 5 ملیار هێلکە بەرهەم دەهێنرێن، ئەمەش نیشانەی کورتهێنانێکی گەورەیە لە بازاڕدا."
بە گوتەی ئەو بەرپرسە، پێویستیی ساڵانەی عێراق بۆ گۆشتی مریشک و گۆشتی سوور زیاتر لە 900 هەزار تۆنە، بەڵام لە ساڵی 2026دا تەنیا 400 هەزار تۆن بەرهەم هێنراوە.
قوسەی حەتاب روونیکردەوە، هێلکە و مریشک لە پارێزگاکانی هەرێمی کوردستانەوە بەبێ کێشە دەگاتە پارێزگاکانی خواروو و نێوەڕاستی عێراق و هەوڵیش دەدەن بە تەواوکردنی رێکارەکانیان، کورتهێنانەکان بەتەواوی پڕ بکەنەوە.
گوتەبێژی وەزارەتی کشتوکاڵ دەشڵێت، بڕیاردراوە رێکارە رۆتینییەکان بۆ نوێکردنەوەی مۆڵەتی کێڵگەکان کەم بکەنەوە و تەنیا بە "بەڵێننامە" کارەکانیان بۆ رایی بکرێ، تاوەکو پڕۆسەی بەرهەمهێنان نەوەستێت؛ هەروەها هەوڵ دەدرێت نرخی ئالیک و پێداویستییە سەرەتاییەکان بۆ جووتیاران کەم بکرێتەوە تاوەکو نرخ لە بازاڕدا بۆ هاووڵاتیان دابەزێ.
