نرخی گازی بازرگانی بەرزبووەوە

رووداو دیجیتاڵ

بەهۆی کەمکردنەوەی بەرهەمهێنانی گاز لە هەرێمی کوردستان، نرخی گازی بازرگانیی ماڵان بەرزبووەوە.

لە 2ی ئەم مانگەوە بەهۆی چاکسازی لە کێڵگەی کۆرمۆر لە پارێزگای سلێمانی کە سەرچاوەی سەرەکیی گازی هەرێمی کوردستانە، بەرهەمهێنانی گاز نزیکەی 30% کەم بووەتەوە.

بەهمەن شێخ قادر، گوتەبێژی بەنزینخانەکانی سلێمانی، ئەمڕۆ سێشەممە بە تۆڕی میدیایی رووداوی گوت: "ئەمڕۆ لیترێک گازی بازرگانی بە 730 بۆ 750 دینارە، بەڵام پێش کەمبوونەوەی بەرهەم 650 دینار بوو، بەگشتی لیترێک 75 بۆ 100 دینار بەرزبووەتەوە".

پێش کەمبوونەوەی بەرهەمی گازی کێڵگەی کۆرمۆر، گازی بازرگانی لە هەولێر لیتری لەنێوان 600 بۆ 650 دینار بوو. ئەمڕۆ دووشەممە، جەنگی مەجید، سەرۆکی ئەنجوومەنی بەنزینخانەکانی هەولێر بە رووداوی گوت: "ئەمڕۆ لیتری بە 710 دینارە".

هەر بوتڵێک گازی ماڵان نزیکەی 22 لیتری تێدەکرێت، بەگوێرەی نرخی ئەمڕۆ، یەک بوتڵی بازرگانی لە سلێمانی نزیکەی 16 هەزار دینارە و لە هەولێر 15 هەزار و 500 دینارە.

عومەر عەبدوڵڵا، بەرپرسی دابەشکردنی گاز لە سلێمانی، ئەمڕۆ بە رووداوی گوت: "گازی باش کۆگە کراوە، تاوەکو دوو مانگی دیکەش چاکسازی کۆرمۆر تەواو نەبێ ئێمە کێشەی دابەشکردنی گازی ماڵانمان نابێ".

لەبارەی نرخی بەنزینیشەوە، بەهمەن شێخ قادر گوتی: "نرخی بەنزینی نۆرماڵ هەر لیترێکی 50 دینار دابەزیوە و ئێستا لیتری بە هەزار و 150 دینارە و جێگیرە".

هەروەها جەنگی مەجید گوتی: "نرخی بەنزین چەند رۆژێکە لە ئاستێکدا وەستاوە و لیتری نۆرماڵی بازرگانی بە هەزار و 395 دینارە".

مانگی رابردوو نرخی لیترێک بەنزینی نۆرماڵ لە سلێمانی هەزار و 200 دینار و لە هەولێر هەزار و 750 دینار بوو.

جگە لە بەنزینی بازرگانی، رۆژانە لە هەموو شارەکانی هەرێمی کوردستان بەنزینی نۆرماڵ بە نرخی پاڵپشتیکراو دابەش دەکرێ لیتری بە 750 دینارە.