رووداو دیجیتاڵ
دوای ئەوەی لە کاتی کردنەوەی بازاڕەکاندا بەهای دینار دابەزینێکی پێوانەیی تۆمارکرد و 100 دۆلار 170 هەزار دیناری تێپەڕاند، ئێوارەی ئەمڕۆ چوارشەممە بازاڕ هێوربووەوە و دینار بەشێک لە بەها لەدەستچووەکەی بۆ گەڕایەوە.
حاجی سابیر باواجی، سەرۆکی ئەنجوومەنی بازاڕی ئاڵوگۆڕی دراو لە هەولێر، ئەمڕۆ چوارشەممە 07-10-2026 بە تۆڕی میدیایی رووداوی گوت: "بەهای دینار بەرزبووەتەوە و 100 دۆلار بە 165 هەزار و 300 دینارە".
هاوکات لەکاتی داخستنی بازاڕی دۆلارەکەی سلێمانی، 100 دۆلار بە 165 هەزار و 200 دینار فرۆشرا.
سەرۆکی ئەنجوومەنی بازاڕی ئاڵوگۆڕی دراو لە هەولێر دەڵێت: "ئەمڕۆ 100 دۆلار گەیشتە 170 هەزار دینار، بەڵام دوای هێوربوونەوەی بازاڕ، دینار کەمێک لە بەهاکەی بۆ گەڕایەوە".
حاجی سابیر باواجی ئاماژەی بەوە کرد، ئەگەر بانکی ناوەندی دۆلار بە ئاسانی بگەیێنێتە بازرگانان و ئەو کەسانەی پێویستیان بە دۆلارە، بەهای دۆلار لەوەی هەیە زیاتر بەرز نابێتەوە.
ئەمڕۆ چوارشەممە 07-10-2026، بانکی ناوەندیی عێراق و ئەنجوومەنی وەزیرانی عێراق نرخی نوێی دۆلاریان بە دینار دیاری کرد، کە دوێنێ بڕیاری لەسەر درابوو و لەمەودوا بەشێوەیەک دەبێ، کە 100 دۆلار بە 152 هەزار دینار دەدرێتە بازرگانان و هاووڵاتیان.
پێش بڕیاری گۆڕانی نرخی دۆلار، 100 دۆلار بە نرخی فەرمیی بانکی ناوەندی بە 132 هەزار دینار بوو، لە بازاڕەکاندا لەنێوان 145 بۆ 150 هەزار دینار مامەڵەی پێوە دەکرا.
بەرزکردنەوەی نرخی فرۆشتنی دۆلار و دابەزینی بەهای دینار، ناڕەزایی پەرلەمانتارانی عێراقی لێکەوتووەتەوە و بڕیارە سبەی پێنجشەممە 08-10-2026، پەرلەمان کۆببێتەوە و بانگهێشتی پارێزگاری بانکی ناوەندی و وەزیری دارایی عێراق بکات.
.jpg&w=3840&q=75)
