بەغدا مووچەی مانگی 9ی نارد؛ 'ئەمڕۆ خشتەی مووچە بڵاودەکرێتەوە'

رووداو دیجیتاڵ 

وەزارەتی دارایی و ئابووریی حکومەتی هەرێمی کوردستان رایگەیاند، تەمویلی مووچەی مانگی 9ی مووچەخۆران خراوەتە سەر هەژماری بانکیی وەزارەتەکەیان کە زیاتر لە 835 ملیار دینارە.

بەگوێرەی وەزارەتی دارایی و ئابووری، ئەمڕۆ بڕی 835 ملیار و 553 ملیۆن دینار وەک تەمویلی مووچەی مانگی ئابی فەرمانبەران و مووچەخۆرانی هەرێمی کوردستان خراوەتە سەر هەژماری بانکیی وەزارەتەکە لە لقی هەولێری بانکی ناوەندیی عێراق.

وەکو لە راگەیێندراوی وەزارەتەکەدا هاتووە، هاوشێوەی چەند مانگی رابردوو وەزارەتی دارایی فیدراڵ بڕی 120 ملیار دیناری وەک پشکی گەنجینەی فیدراڵی لە داهاتی نانەوتیی هەرێمی کوردستان بۆ مانگی ئەیلوول لە کۆی تەمویلی مووچە بڕیوە.

هەروەها وەزارەتی دارایی ئاماژەی بەوەش کردووە، بەغدا بڕی 4 ملیار و 961 ملیۆن دیناری لە تەمویلی مووچەی مانگی ئەیلوول نەناردووە، کە بریتییە لە شایستەی مووچەی مانگەکانی رابردووی خانەنشینانی شارستانی و سەربازی.

وەزارەتی دارایی و ئابووریی هەرێمی کوردستان لە راگەیێندراوەکەیدا ئەوەشی خستووەتەڕوو، هەر ئەمڕۆ پێنجشەممە خشتەی مووچە بڵاودەکرێتەوە.