رووداو دیجیتاڵ
سەرۆکی هەرێمی کوردستان پرسە و سەرەخۆشی بۆ کۆچی دوایی شاعیر و نووسەری کورد، رەفیق سابیر راگەیاند و دەڵێت، ئەو شاعیرە خزمەتێکی بەرچاوی وێژە و رۆشنبیریی کوردی کردووە و یادی بۆ هەمیشە بە زیندوویی دەمێنێتەوە.
رۆژی شەممە، 28-2-2026، نێچیرڤان بارزانی، سەرۆکی هەرێمی کوردستان لە پەیامێکی سەرەخۆشیدا رایگەیاند: "پرسە و سەرەخۆشیی قووڵمان ئاراستەی خانەوادەی بەڕێزیان و تەواوی نووسەران و رۆشنبیرانی کوردستان دەکەین، هاوسۆز و هاوبەشی خەمیانین"
سەرۆکی هەرێمی کوردستان دەشڵێت: "خوالێخۆشبوو رەفیق سابیر، بە کار و بەرهەمەکانی، خزمەتێکی بەرچاوی وێژە و رۆشنبیریی کوردی کردووە."
رەفیق سابیر، شاعیر و نووسەری ناسراوی کورد، لە وڵاتی سوێد کۆچی دواییکرد.
ئەو خاوەنی چەندین دەقی ئەدەبییە، دیارترینیان شیعری "بەتەنیا جێم مەهێڵن"ـە کە بۆ کارەساتی کیمیابارانکردنی هەڵەبجە نووسیویەتی و بە فراوانی بڵاوبووەوە.
ئەو شاعیرە خەڵکی شاری قەڵادزێیە و لە ساڵانی هەشتاکانەوە نیشتەجێی وڵاتی سوێد بوو. لە رابردوودا کاری سیاسی لەگەڵ حیزبی شیوعی عێراق کردووە، دوای راپەڕین لێی جیابووەوە و ماوەیەک بووە سەرکردەی شیوعییە کوردستانییەکان، دواتریش بەتەواوی لە کاری سیاسی دوورکەوتەوە.
.jpg&w=3840&q=75)
