رووداو دیجیتاڵ
گرووپی (سەرایا ئەولیا دەم) کە خۆیان وەک بەشێک لە "موقاوەمەی ئیسلامی لە عێراق" دەناسێنن، رۆژی یەکشەممە 1ـی ئاداری 2026 رایگەیاند، لە رێگەی ژمارەیەک (درۆن)، هێرشیان کردووەتە سەر بنکە سەربازییەکانی ئەمریکا لە شاری هەولێر.
لە راگەیێندراوێکدا ئەو گرووپە ئاماژەی بەوە کردووە، هێرشەکە "وەک پشتیوانییەک بۆ کۆماری ئیسلامیی ئێران لە بەرامبەر ئەمریکا و ئیسرائیل" و هەروەها بۆ "بەرگریکردن لە سەروەریی عێراق" کراوە.
بەپێی دەقی راگەیێندراوەکە، هێرشەکە لە رێگەی "ژمارەیەک درۆن" کرا و بنکە ئەمریکییەکانی لە هەولێر کردووەتە ئامانج.
هەتاوەکو ئێستا لایەنە فەرمییەکانی هەرێمی کوردستان و هێزەکانی هاوپەیمانان هیچ روونکردنەوەیەکیان لەبارەی زیانە گیانی و ماددییەکانی ئەو هێرشە یان راستی و دروستیی بانگەشەی ئەو گرووپە بڵاونەکردووەتەوە.
دوێنێ شەممە، دوای دەستپێکردنی هێرشە هاوبەشەکانی ئێران و ئیسرائیل بۆ سەر ئێران، هەمان گرووپ رایگەیاند، "موجاهیدەکانمان ئۆپەراسیۆنێکی جۆرییان لە رێگەی سێ درۆنەوە کردووە و بارەگای فەرماندەیی ئۆپەراسیۆنە هاوبەشەکانیان لە هەولێر کردووەتە ئامانج."
گرووپەکە لە راگەیێندراوەکەیدا هۆکاری هێرشەکەی بۆ "پشتیوانیکردن لە کۆماری ئیسلامیی ئێران لە بەرامبەر دەستدرێژییەکانی ئەمریکا و ئیسرائیل" گەڕاندەوە. هەروەها جەختی کردەوە کە ئەم هەنگاوەیان وەک "بەرگری لە سەروەریی عێراق" کردووە.
سەرایا ئەولیا دەم، یەکێکە لەو گرووپە چەکدارانەی دوای کوژرانی قاسم سولەیمانی، فەرماندەی پێشووی فەیلەقی قودسی سوپای پاسداران و ئەبو مەهدی موهەندیس، جێگری پێشووی سەرۆکی دەستەی حەشدی شەعبی لە ساڵی 2020 دەرکەوت.
یەکەمجار نییە ئەم گرووپە هێرش بکاتە سەر هەرێمی کوردستان. رۆژی 15ی شوباتی 2021ی هێرشێکی دیکەی مووشەکیی سەر شاری هەولێری گرتە ئەستۆ، کە تێیدا بەڵێندەرێکی سڤیل کوژرا و سەربازێکی ئەمریکی و چەند کەسێکی دیکە برینداربوون. دواتر ئەنجوومەنی ئاسایشی هەرێمی کوردستان دانپێدانانی ئەنجامدەری هێرشەکەی بڵاوکردەوە.
ڤیدیۆی نوێ گەیشت؛ دیمەنی ساتی هێرشەکەی سەر هەولێر، ببینن دووکەڵێکی زۆر بەرز دەبێتەوە
— Rudaw (@Rudawkurdish) March 1, 2026
هاونیشتمانییان ڤیدیۆکانیان بۆ رووداو ناردوون pic.twitter.com/dSV5IcTQ0S
ڤیدیۆ... هێرشکرایەوە سەر هەولێر و دووکەڵ لە نزیکی فڕۆکەخانە بەرز دەبێتەوە pic.twitter.com/WLUz4GXpQe
— Rudaw (@Rudawkurdish) March 1, 2026
.jpg&w=3840&q=75)
