رووداو دیجیتاڵ
چوار درۆن لە ئاسمانی هەولێر خرانە خوارەوە، کە ئاراستەی فڕۆکەخانە کرابوون، گرووپێکی چەکداریی شیعەش بەرپرسیارێتیی خۆی لەو هێرشە راگەیاند.
شەوی 4ی ئاداری 2026، سیستمی بەرگری چوار هێرشی درۆنی تێکشکاند کە ویستبوویان فڕۆکەخانەی نێودەوڵەتیی هەولێر بکەنە ئامانج.
یەکێک لە درۆنەکان لە دوای تێکشاندنی، نزیک کەنیسەیەکى قەزاى عەنکاوە کەوتووەتەخوارەوە، یەکێکى دیکەیان لە شوێنێکی لە سڤیلنشینی گەڕەکی 32ی پارک (سەربەستی) کەوتە خوارەوە.
پەیام سەربەست، پەیامنێری رووداو لە شوێنی کەوتنەخوارەوەی درۆنەکە رایگەیاند؛ ئەو درۆنە کەوتووەتە ناو پارچە زەوییەک، بەهۆیەوە کەسێک بریندار بووە.
یەکێک لە شایەتحاڵەکان لەو گەڕەکە بە (رووداو)ی گوت: "بریندارەکە شۆفێری ماتۆڕسکیلێکی دلیڤەری بووە و بە ئەمبوڵانس گواسترایەوە ."
گرووپی "سەرایا ئەولی لدەم" لە راگەیێنراوێکدا بەرپرسیارێتیی خۆی لەو هێرشە راگەیاند، کە گوایە بنکەی هێزەکانی ئەمریکایان لە فڕۆکەخانەی هەولێر کردووەتە ئامانج، بە پاساوی تۆڵەسەندنەوە بۆ کوژرانی عەلی خامنەیی، رێبەری پێشووی کۆماری ئیسلامیی ئێران و کوژرانى ژمارەیەک گەنجى عێراقى، کە بەرگریکار ناوى بردوون.
.jpg&w=3840&q=75)
