ئاوی سلێمانی: کێشەی ئەو گەڕەکانە چارەسەر دەکرێت کە هەفتەی جارێک ئاویان پێدەدرێت

رووداو دیجیتاڵ

گوتەبێژی بەڕێوەبەرایەتیی ئاوی سلێمانی رایگەیاند، پێدانی ئاو لە گەڕەکەکانی شارەکە دەبێتە سێ رۆژ جارێک.

ئامانج جەلال، گوتەبێژی بەڕێوەبەرایەتیی ئاوی سلێمانی رایگەیاند: "ئەمڕۆ سێ پەمپی نوێ دەخرێنە کار و بە تەواوی گرفتی ئاوی ئەو گەڕەکانە چارەسەر دەبێت کە شەش رۆژ یان حەوت رۆژ جارێک ئاویان پێدەگەیشت."

بەپێی قسەکانی ئامانج جەلال، دۆخی ئاوی ئەو گەڕەکانە ئاسایی دەبێتەوە و سێ رۆژ جارێک ئاویان پێدەگات، یاخود "لە خراپترین دۆخدا چوار رۆژ جارێک ئاویان دەبێت."

ئەو سێ پەمپە نوێیە، بڕی بەردانەوەی ئاو بۆ سلێمانی زیاد دەکەن. ئامانج جەلال دەڵێت: "بۆ هەر کاژێرێک، نزیکەی سێ هەزار مەتر سێجا ئاو بۆ هێڵی دووی ئاوی دووکان - سلێمانی زیاد دەکات."

ئامانج جەلال گوتی: "دوای 19 کاژێر کارکردنی بێ وەستانی تیمەکانمان، بەرەبەیانی ئەمڕۆ توانرا بۆرییە شکاوەکەی هێڵی دووی ئاوی دووکان - سلێمانی چاکبکرێتەوە."

گوتەبێژی ئاوی سلێمانی ئاماژەی بەوەش کرد، دەست بە ناردنی ئاو کراوەتەوە لە دووکانەوە بۆ سلێمانی و ئاو دەگاتەوە گەڕەکی قرگە و گەڕەکەکانی دیکەی وەک کوردسات و ئەوانەی دیکە کە ئاویان لەسەر هێڵی دووی ئاوی دووکان - سلێمانییە.

قسەکانی ئامانج جەلال ئەمڕۆ یەکشەممە لەکاتی بەشداریکردنی بوو لە بووڵتەنی کاژێر 11ـی تۆڕی میدیایی رووداو کە ئارێز خالید پێشکێشیکرد.

لەبارەی ئەو گەڕەکانەی تۆڕی ئاویان نییە، ئامانج جەلال گوتی: "لە 15%ـی گەڕەکەکانی سلێمانی تۆڕی ئاویان نییە، کە گەڕەکە تازەکانن و چوونەتە ناو ماستەرپلانی بەڕێوەبەرایەتیی ئاوی سلێمانییەوە، یان ئەو گەڕەکانەن کە بەردەوام لە فراوانبووندان."

بەڕێوەبەرایەتیی ئاوی سلێمانی، لە رێگەی تانکەرەوە ئاو بۆ بەشێک لەو گەڕەکانە دابین دەکات. ئامانج جەلال دەڵێت: "چوار هەزار ماڵ لە رێگەی تانکەرەکانی بەڕێوەبەرایەتیی ئاوی سلێمانییەوە ئاویان بۆ دابین دەکرێت و ئەوەندە ئاویان پێدەدرێت کە بەشیان بکات تاوەکو جارێکی دیکە ئاویان پێدەدرێتەوە."

نزیک کاژێر 03:00ـی بەرەبەیانی ئەمڕۆ یەکشەممە، بەڕێوەبەرایەتیی ئاوی سلێمانی لە راگەیێندراوێکدا رایگەیاند: "دوای زیاتر لە 19 کاژێر کارکردنی بەردەوام، توانرا کاری چاککردنی بۆری هێڵی دووی ئاوی دووکان - سلێمانی تەواو بکرێت."

بۆری ئاوی دووکان - سلێمانی بەرەبەیانی دوێنێ 8ـی ئاب شکا. بەختیار تاهیر، بەڕێوەبەری گشتیی ئاوی سلێمانی بە رووداوی راگەیاند، گەڕەکەکانی دەرەوەی شەقامی 60 مەتریی سلێمانی بێئاو دەبن، لەوانەش ئیبراهیم ئەحمەد، سێتوان، کانی با، کازیوە و کۆمپانیاکانی نەوزاد.