رووداو دیجیتاڵ
بەڕێوەبەری نەوت و کانزاکانی پارێزگای دهۆک رایگەیاند، بەهۆی باشتربوونی دۆخی دابەشکردنی بەنزین، رێکاری نوێیان گرتووەتەبەر و ماوەی وەرگرتنی بەنزینیان بۆ شۆفێران کەمکردووەتەوە.
رۆژی دووشەممە، 24ـی ئابی 2026، کارزان رەئووف، بەڕێوەبەری نەوت و کانزاکانی پارێزگای دهۆک بە تۆڕی میدیایی رووداوی راگەیاند: "هەندێک رێنمایی نوێمان دەکردووە، ئەمەش بۆ ئەوەی دابەشکردنی بەنزین باشتر بکرێت و خێراتر بێت".
پێشتر ئۆتۆمبێلی کرێ (تەکسی) سێ رۆژ جارێک و ئۆتۆمبێلی تایبەت پێنج رۆژ جارێک 40 لیتر بەنزینیان وەردەگرت. کارزان رەئووف گوتی: "ئێستا بڕیارمانداوە ماوەکە کەمبکەینەوە دوو رۆژ بۆ تەکسی و چوار رۆژ بۆ ئۆتۆمبێلی تایبەت."
بەڕێوەبەری نەوت و کانزاکانی دهۆک ئاماژەی بەوەش کرد، ئەم بڕیارە لە پێناو بەرژەوەندی هاووڵاتییاندایە و پرۆسەی دابەشکردنەکەش هەر لە رێگەی ئەپڵیکەیشنەوە بەردەوام دەبێت.
بە گوتەی کارزان رەئووف، هەر شۆفێرێک لە کاتی وەرگرتنی بەنزین، ژمارەی ئۆتۆمبێلەکەی سکان دەکرێت و تاوەکو چوار رۆژ بۆ ئۆتۆمبێلی تایبەت و دوو رۆژ بۆ تەکسی، ناتوانێت دووبارە سوودمەند بێتەوە.
بەڕێوەبەری نەوت و کانزاکانی دهۆک گوتی: "ئێستا لە سەرانسەری دهۆک، لە 22 بەنزینخانە بەنزین دابەشدەکرێت".
