.jpg&w=3840&q=75)
رووداو دیجیتاڵ
نزیکەی 10 هەزار پێشمەرگەی خانەنشینی یەکەی 70 بەهۆی ئەوەی میلاکیان لەسەر وەزارەتی دارایی نییە، مووچەکانیان لەسەر داهاتی ناوخۆ دابەش دەکرێت و بەو هۆیەشەوە بەردەوام دوا دەکەوێت. بەڕێوەبەرایەتیی گشتیی خانەنشینیی پێشمەرگەش دەڵێت، چاوەڕێی رەزامەندیی ئەنجوومەنی وەزیرانن.
نازم نەسرەدین، پێشمەرگەیەکی خانەنشین کە نوێنەرایەتیی بەشێک لەو خانەنشینانە دەکات، بە رادیۆی رووداوی راگەیاند: "ئێمە کە ژمارەمان زیاتر لە نۆ هەزار کەسە، تەمەنمان گەیشتووەتە 60 ساڵ و زیاتر لە 20 ساڵ پێشمەرگایەتیمان کردووە؛ هیچ رەوا نییە مووچەکانمان لەگەڵ گرێبەستەکان دابنرێت و بخرێتە سەر داهاتی ناوخۆ، چونکە بەو هۆیەشەوە مووچەی مانگی حەوتمان تاوەکو ئێستا وەرنەگرتووە."
ئەو خانەنشینە داوا لە حکومەت دەکات چارەسەرێکی خێرایان بۆ بدۆزرێتەوە و ناوەکانیان بخرێتە سەر وەزارەتی دارایی تاوەکو لەو دڵەڕاوکێیە و دواکەوتنی مووچە رزگاریان بێت.
فەتحوڵڵا عومەر، جێگری بەڕێوەبەری گشتیی خانەنشینیی پێشمەرگە، بە رادیۆی رووداوی راگەیاند، رێکارە کارگێڕییەکان لای ئەوان تەواو بوون و گوتی: "ئێمە نووسراومان بۆ ئەنجوومەنی وەزیران کردووە بۆ وەرگرتنی رەزامەندی، چونکە ئەم خانەنشینانە هێشتا نەچوونەتە سەر میلاکی وەزارەتی دارایی، بەڵام تاوەکو ئێستا ئەنجوومەنی وەزیران بڕیاری لەسەر نەداوە."
بەپێی زانیارییەکانی جێگری بەڕێوەبەری گشتی، ژمارەی ئەو خانەنشینانە دەگاتە نۆ هەزار و 800 کەس و دەڵێت: "هەردوو وەزارەتی پێشمەرگە و وەزارەتی دارایی رەزامەندییان داوە بۆ گواستنەوەی میلاکیان، بەڵام تەنیا رەزامەندیی ئەنجوومەنی وەزیران ماوە."
ئەم کێشە کارگێڕییە وایکردووە کە خانەنشینانی یەکەی 70، بە پێچەوانەی خانەنشینانی دیکەی مەدەنی و سەربازی، مووچەکانیان لە لیستی کۆتاییدا بێت و تاوەکو رەزامەندیی حکومەتیش نەبێت، ناتوانرێت مووچەکانیان بخرێتە سەر بودجەی گشتی و لەگەڵ فەرمانبەرانی دیکەدا مووچەکانیان وەربگرن.
