رووداو دیجیتاڵ
سەرۆکایەتیی شارەوانیی هەولێر کۆتاییهاتنی پڕۆژەی قیڕکردنی 10 شەقامی لە گەڕەکی فەرمانبەران و شەقامی 30 مەتری راگەیاند، کە تێچووەکەیان 600 ملیۆن دینار بووە و لەسەر داهاتی شارەوانی جێبەجێ کراون.
کارزان عەبدولهادی، سەرۆکی شارەوانیی هەولێر، رۆژی شەممە 29ـی ئابی 2026، بە تۆڕی میدیایی رۆدواو رایگەیاند: "لە چوارچێوەی پڕۆژە خزمەتگوزارییەکانماندا، 10 شەقامی گەڕەکی فەرمانبەران و شەقامی 30 مەتریی هەولێرمان قیڕ کرد، کە هەفتەی رابردوو 100%ـی کارەکانیان تەواو بوون."
سەرۆکی شارەوانیی هەولێر گوتی، پڕۆژەکە تەنیا قیڕکردن نەبووە، بەڵکو هێڵکاری بۆ شەقامەکان کراوە و گوڵ و دار لە دەورەبەری رێگەکان چێنراون.
سەبارەت بە تێچووی پرۆژەکان، کارزان عەبدولهادی رایگەیاند: "بودجەی ئەم شەقامانە 600 ملیۆن دینار بووە و لەسەر بودجەی 15%ـی داهاتی شارەوانی جێبەجێ کراوە." راشیگەیاند، ئەم پڕۆژانە لەسەر داواکاریی هاونیشتمانییانی ئەو گەڕەکانە بووە.
سەرۆکی شارەوانیی هەولێر ئاماژەی بەوەدا بەپێی ئەو بودجەیەی لەبەردەستیاندایە، لە گەیاندنی خزمەتگوزارییەکان بە گەڕەکەکانی شار بەردەوام دەبن.
