رووداو دیجیتاڵ
دوای ئەوەی ژنەک لە رێی شاشەی رووداوەوە داواکاریی خۆی گەیاند، بە فەرمانی سەرۆکوەزیرانی هەرێمی کوردستان بڕیاردرا حەربییە خان، هاوژینی شەهیدێکی ئەنفالی بادینانە، ئەم ساڵ بنێردرێت بۆ حەج.
حەربییە خان، دانیشتووی ناحیەی سەرسنگە لە سنووری پارێزگای دهۆک، رۆژی 26-8-2026 لە رێی مایکی رووداوەوە داوای کردبوو هاوکاری بکرێت بۆ ئەوەی بڕواتە حەج.
یەکشەممە 30ـی ئابی 2026، بە فەرمانی مەسرور بارزانی، سەرۆکوەزیرانی هەرێمی کوردستان و بە پێشنیازی وەزیری ئەوقاف و کاروباری ئایینی، بڕیاردرا داواکارییەکەی جێبەجێ بکرێت.
نەبەز ئیسماعیل، گوتەبێژی وەزارەتی ئەوقاف و کاروباری ئایینی بە تۆڕی میدیایی رووداوی راگەیاند: "بە پێشنیازی د. پشتیوان سادق، وەزیری ئەوقاف و کاروباری ئایینی و بە فەرمانی سەرۆکوەزیران، ئەم خانمە کە هاوژینی شەهیدی ئەنفالە، ئەم ساڵ لەسەر پشکی شەهیدان گەشتی حەج دەکات."
گوتەبێژی وەزارەتی ئەوقاف دەڵێ، ئەم بڕیارە لە چوارچێوەی خزمەتکردنی کەسوکاری سەربەرزی شەهیدانی کوردستانە، ئاماژەی بەوەش کرد ساڵانە 120 کەس لە وارسی شەهیدان لەسەر پشکی تایبەتی شەهیدان رەوانەی حەج دەکرێن.
دوای بڕیارەکە حەربییە خان بە رووداوی راگەیاند: "زۆر دڵخۆشم، ئەوەندە دڵخۆشم ناتوانم دەریبڕم. سوپاسی سەرۆکوەزیران و کاک نێچیرڤان بارزانی و کاک مەنسوور بارزانی و رووداو دەکەم داواکاریی منتان گەیاند."
ئەو خانمە ئاماژەی بەوەش کرد پێشتر سێ بۆ چوار جار ناوی بۆ حەج نووسیوە بەڵام ناوی دەرنەچووە، هەرچەندە سێ جار چووەتە عومرە، بەڵام ئاواتی بووە بچێتە حەج و گوتی: "کە بیستم بڕیارەکە دراوە، سوجدەی شوکرم برد، چونکە ئاواتی دڵم هاتەدی، لەوێ نزای خێر بۆ هەموو کوردستان دەکەم."
