رووداو دیجیتاڵ
مەسرور بارزانی، سەرۆکوەزیرانی هەرێمی کوردستان، لە شاری دهۆک لەگەڵ بەرپرس و فەرماندەکانی پێشمەرگە، پۆلیس و هێزەکانی ئاسایشی ناوخۆ کۆبووەوە و جەختی لە سەروەریی یاسا کردەوە.
بەپێی راگەیێندراوێکی حکومەتی هەرێمی کوردستان، ئەمڕۆ شەممە 24ـی تشرینی یەکەمی 2026، مەسرور بارزانی لە میانەی کۆبوونەوەکەدا سوپاسی هەوڵ و ماندووبوونی هێزەکانی پێشمەرگە، پۆلیس و ئاسایشی ناوخۆی کردووە لە پاراستنی هاووڵاتییان و دەستەبەرکردنی ئاسایش و سەقامگیری لە هەرێمی کوردستان.
هەر لەو کۆبوونەوەیەدا، سەرۆکوەزیرانی هەرێمی کوردستان جەختی لە پرەنسیپی سەروەریی یاسا کردەوە و فەرماندە و بەرپرسانی ئەمنیی راسپارد کە لە جێبەجێکردنی یاسا، سزادانی تاوانباران و پاراستنی سەروماڵی هاووڵاتییان بەوپەڕی دڵسۆزییەوە ئەرکەکانیان راپەڕێنن و رێگە بە هیچ کەمتەرخەمییەک نەدەن.
