رووداو دیجیتاڵ
بەرپرسی پەیوەندیەكانی كۆمەڵەی شۆڕشگێڕی زەحمەتكێشانی كوردستانی ئێران راگەیاند، ئەمشەو لە رێگەی درۆنێکەوە هێرش کراوەتە سەر حیزبەکەیان لە سنووری دۆڵی ئاڵانە و هێرشەکە هیچ زیانێکی گیانیی لێنەکەوتووەتەوە.
رۆژی شەممە، 24ـی تشرینی یەکەمی 2026، عەلی رەنجبەری، بەرپرسی پەیوەندیەكانی كۆمەڵەی شۆڕشگێڕی زەحمەتكێشانی كوردستانی ئێران بە تۆڕی میدیایی رووداوی راگەیاند: "نزیکەی کاژێر 10ـی ئەمشەو لە رێگەی درۆنێکەوە هێرش کرایە سەر حیزبەکەمان لە دۆڵی ئاڵانە. درۆنەکە لە لای حاجی ئۆمەرانەوە هاتبوو، بەڵام خۆشبەختانە هیچ زیانێکی گیانیی نەبوو و تەنیا زیانی مادی لێکەوتەوە."
ئەو ئەندامەی كۆمەڵەی شۆڕشگێڕی زەحمەتكێشانی كوردستانی ئێران گوتی: "لەسەرەتای دەستپێکردنی هێرشەکانەوە تاوەکو ئێستا، بە سەدان درۆن هێرشیان کردووەتە سەر بارەگاکانمان."
بە گوێرەی بەدواداچوونی تۆڕی میدیایی رووداو بۆ ئەو هێرشانەی دەکرێنە سەر هەرێمی کوردستان، لە دەستپێکی جەنگەکەوە تاوەکو ئێستا بە زیاتر لە هەزار درۆن و مووشەک هێرش کراوەتە سەر هەرێمی کوردستان، لە ئەنجامدا 32 کەس گیانیان لەدەست داوە و 156 کەسیش بریندار بوون.
