رووداو دیجیتاڵ
دۆناڵد ترەمپ رایگەیاند، ئێران بەپەلە دەیەوێت رێککەوتن بکات، بەڵام ئەو بڕیار دەدات دەچنە نێو ئەو رێککەوتنە یان نا.
رۆژی دووشەممە 14-09-2026 دۆناڵد ترەمپ، سەرۆکی ئەمریکا لە تروس سۆشیاڵ رایگەیاند: "وڵاتە شکستخواردووەکەی ئێران دەیەوێت بەخێرایی و زۆر بە پەرۆشییەوە رێککەوتنێک بکات. من بڕیار دەدەم کە ئایا ئەمریکا بەشداری دەکات یان نا - کە ئێمە کراوەین بۆ ئەو بیرۆکەیە."
ئەم لێدوانەی ترەمپ لە کاتێکدایە گرژییەکانی رۆژهەڵاتی نێوەڕاست بەردەوامن و رۆژی یەکشەممە (13-09-2026)، عومان رایگەیاند کۆبوونەوەی نێوان ئێران و وڵاتانی کەنداو سەبارەت بە تەنگەی هورمز، کە بڕیار بوو رۆژی دووشەممە بەڕێوەبچێت، دواخراوە.
ئاژانسی هەواڵی عومان بڵاویکردەوە، بڕیاردراوە کۆبوونەوەکەی شاری سەلالە بۆ کاتێکی دیکە دوابخرێت، بە ئامانجی رەخساندنی زەوینەیەک بۆ دیالۆگێکی بنیادنەرانە.
پێشتر وەزارەتی دەرەوەی ئێران رایگەیاندبوو، عومان میوانداریی کۆبوونەوەیەک دەکات بۆ گفتوگۆکردن لەسەر داهاتووی تەنگەکە کە بۆ گواستنەوەی نەوت و گازی جیهانی زۆر گرنگە.
لەلایەکی دیکەوە، بەدر بوسەعیدی، وەزیری دەرەوەی عومان لە ئێکس رایگەیاند: "ئێمە سوورین لەسەر برەودان بەو دیالۆگەی کە بەشدارە لە سەقامگیری و هاوکاریی بەردەوام لە ناوچەکەماندا".
عومان و ئێران چەند هەفتەیەکە تاوتوێی چۆنیەتیی بەڕێوەبردنی ئەو رێڕەوە ئاوییە گرنگە دەکەن.
لە 28ـی شوباتی رابردووەوە، دوای ئەوەی ئەمریکا و ئیسرائیل هێرشیانکردە سەر ئێران و جەنگێکی فراوانتر لە ناوچەکەدا دروستبوو، تەنگەی هورمز رووبەڕووی گەمارۆی ئێران و دواتریش ئەمریکا بووەتەوە. دوای زیاتر لە شەش مانگ لە جەنگی رۆژهەڵاتی نێوەڕاست، بەردەوامیی ئەم گەمارۆیە نرخی نەوتی بەرزکردووەتەوە، کە لەم هەفتەیەدا گەیشتە سەروو 100 دۆلار بۆ هەر بەرمیلێک.
