رووداو دیجیتاڵ
سەرۆککۆماری ئێران دەڵێت، پێویستە پەیوەندییە ئابووری، سیاسی و کولتوورییەکانی نێوان وڵاتەکەی و هەرێمی کوردستان پتەوتر بکرێن؛ ئاماژە بەوەش دەکات، ئامادەن لە رێگەی گفتوگۆوە هەر پرسێک لەگەڵ وڵاتانی دراوسێیان چارەسەر بکەن.
رۆژی چوارشەممە، 16-09-2026، مەسعود پزیشکیان، سەرۆککۆماری ئێران لەکاتی کۆبوونەوەی لەگەڵ بافڵ جەلال تاڵەبانی، سەرۆکی یەکێتیی نیشتمانیی کوردستان لە تاران، باسی لە پەیوەندییەکانی نێوان وڵاتەکەی و هەرێمی کوردستان کرد.
مەسعود پزیشکیان رایگەیاند، پەیوەندییە مێژوویی، کولتووری و کۆمەڵایەتییەکانی نێوان ئێران و هەرێمی کوردستان دێرینەن و ''بۆ کۆماری ئیسلامیی ئێران گرنگییەکی تایبەتیان هەیە و پێویستە پەرەیان پێبدرێت.''
سەرۆککۆماری ئێران لە بەشێکی قسەکانیدا ئاماژەی بە پێویستیی بەهێزکردنی هاوئاهەنگی و لێکنزیکبوونەوەی وڵاتانی ناوچەکە کرد و گوتی: "پێمانوایە کە گەلانی ناوچەکە خاوەنی پەیوەندیی قووڵ و دێرینن و پێویستە بە پشتبەستن بەو هاوبەشییانە، رێگەی هاوکاری، سەقامگیری و گەشەپێدان خۆش بکەن."
مەسعود پزیشکیان بوونی ئەمریکا لە ناوچەکە بە ''دەستوەردان'' لە کاروباری وڵاتان دەزانێت و دەڵێت: ''بە دروستکردنی ناکۆکی و ململانێ لەنێوان گەلانی ناوچەکە، بەدوای لاوازکردنی تواناکانی وڵاتان و قۆستنەوەی سەرچاوە و سامانیانەوەن، بۆیە پێویستە بە زیاترکردنی هاوئاهەنگی و گفتوگۆ، زەوینەی نائارامی و ناکۆکی کەمبکەینەوە''.
سەرۆککۆماری ئێران ئامادەیی وڵاتەکەی بۆ چارەسەرکردنی کێشەکان لەگەڵ دراوسێکانیدا لە رێگەی دیالۆگ و دانوستاندن دەربڕی و رایگەیاند: ''ئەگەر هەندێک لایەن داواکاریی رەوایان هەبێت، ئامادەین لە چوارچێوەی لێکتێگەیشتن و رێزی بەرامبەردا بەدواداچوون بۆ کێشەکان بکەین و چارەسەریان بۆ بدۆزینەوە؛ لە هەمان کاتدا چاوەڕوانیمان هەیە هەموو لایەنەکان پابەندی بنەماکانی دراوسێیەتیی باش بن و خۆیان بەدوور بگرن لە زێدەڕۆیی و کردەوەی نادروست''.
قسەکانی مەسعود پزیشکیان لەکاتێکدان کە لە سەرەتای جەنگی 40 رۆژەوە کە 28ـی شوباتی ئەم ساڵ دەستیپێکرد، هێزە چەکدارەکانی وڵاتەکەی چەندین جار بە پاساوی زیانگەیاندن بە بەرژەوەندییەکانی ئەمریکا و حیزبەکانی رۆژهەڵاتی کوردستان، هێرشی مووشەکی و درۆنییان کردووەتە سەر ناوچە جیاجیاکانی هەرێمی کوردستان.
بەپێی بەدواداچوونی تۆڕی میدیایی رووداو، لە 28ـی شوباتەوە تاوەکو 15ـی ئەیلوول، لانیکەم بە 1002 درۆن و مووشەک هێرش کراوەتە سەر هەرێمی کوردستان.
